Governu Timor-Leste

Ministru Ensinu Superiór, Siénsia no Kultura, José Honório da Costa Pereira Jerónimo, hala’o vizita ofisiál ba Jakarta, Indonézia, iha loron 19 no 20 fulan-jullu tinan 2024. Objetivu prinsipál husi vizita ida-ne’e mak atu esplora oportunidade kooperasaun iha ensinu superiór no hametin kapasitasaun rekursus umanus nasionais liuhosi parserias ho instituisoins indonézias ensinu superiór nian.

Iha loron 19 fulan-jullu, Ministru José Honório partisipa nu’udar oradór iha semináriu komemorativu aniversáriu ba da-55 Institutu Turizmu (Pariwisata) Trisakti nian, ne’ebé realiza iha Otél Artotel Mangkuluhur. Eventu ne’e konta ho prezensa husi konvidadu liu 500, ne’ebé inklui reprezentante governamentál sira Indonézia nian, profesór sira husi instituisaun oioin no membru sira husi setór privadu. Iha ninia intervensaun, Ministru subliña importánsia turizmu nian nu’udar setór estratéjiku ida ba dezenvolvimentu ekonómiku sustentavel iha Timor-Leste. Anunsia mós planu ba abertura fakuldade turizmu nian ida iha Universidade Nasionál Timor Lorosa’e (UNTL) no institutu politékniku turizmu nian ida, ho apoiu tékniku husi Institutu Teknolojia Bandung, ne’ebé prevee sei hahú iha tinan 2025.

Iha loron hanesan, aleinde semináriu, Ministru no ninia komitiva vizita mós Institutu ITEA Universidade Borobudur, ho objetivu atu observa instalasaun sira no diskute futura kolaborasaun hodi kapasita rekursus umanus Timor-Leste iha área espesializada sira.

Iha loron 20 fulan-jullu, Ministru hala’o sorumutu ho reprezentante sira husi instituisaun tolu ensinu superiór nian iha Jakarta: Universidade Multimedia Nusantara, Grupu Kompas Gramedia, Universidade Mercu Buana no Universidade Atma Jaya. Durante sorumutu sira-ne’e, esplora ona parseria sira ne’ebé iha posibilidade, inklui fó bolsa estudu ba estudante timoroan no programa formasaun ho durasaun badak ba tékniku sira iha Ministériu ne’e. Liuliu, Universidade Mercu Buana manifesta interese atu fó bolsa mestradu no doutoramentu ba estudante sira husi Timor-Leste.

Atu remata ninia vizita ne’e, Ministru hasoru malu ho estudante timoroan sira ne’ebé daudaun ne’e estuda hela iha Jakarta. Sorumutu ida-ne’e fó oportunidade ida hodi rona dezafiu, aspirasaun no rekomendasaun husi estudante sira, ho objetivu atu reforsa apoiu ba estudante timoroan sira iha estranjeiru no dezenvolve setór ensinu superiór iha nivel nasionál.