Governu Timor-Leste

Hosi loron 19 to’o loron 28 fulan-jullu, Timor-Leste simu vizita veteranu na’in-15 husi Nova Zelándia ne’ebé mai Timor-Leste atu prodús dokumentu kona-ba sira-nia partisipasaun iha United Nations Mission in East Timor (UNAMET) no iha International Force East Timor (INTERFET). Delegasaun ne’e lidera husi Prezidente Asosiasaun Veteranus Nova Zelándia, Wayne Buck, no husi Majór-Jenerál Martyn Dunne.

Iha sesta-feira, loron 26 fulan-jullu tinan 2024, veteranu sira husi Nova Zelándia simu husi Primeiru-Ministru, Kay Rala Xanana Gusmão, no husi Ministru Prezidénsia Konsellu Ministrus, Agio Pereira, iha Palásiu Governu. Durante sorumutu ne’e, diskute objetivu vizita nian, ne’ebé atu dokumenta experiénsia no kontribuisaun sira husi veteranu Nova Zelándia nian ba misaun manutensaun pás iha Timor-Leste.

Xanana Gusmão destaka importánsia intervensaun husi forsa Nova Zelándia nian durante períodu krítiku iha Timor-Leste nia istória, hodi afirma katak “prezensa militár Nova Zelándia iha tinan 1999, hanesan iha UNAMET nune’e mós INTERFET, nu’udar ezemplu di’ak tebes. Grasa ba sira-nia partisipasaun no intervensaun, Timor-Leste konsege alkansa situasaun pás no hahú prosesu konstrusaun Estadu.”

Primeiru-Ministru subliña mós katak, enkuantu fatin barak iha mundu forsa manutensaun pás nian hela iha dékada barak nia laran la konsege estabelese pás, iha Timor-Leste, prezensa husi forsa sira-ne’e sai ezemplu ida ba mundu, tanba konsege rezolve ona problema sira no prepara país ba independénsia.

Majór-Jenerál Martyn Dunne, ne’ebé hala’o knaar nu’udár Adjuntu Komandante INTERFET iha Timor-Leste, espresa ninia satisfasaun tan vizita filafali Timor-Leste hafoin tinan ruanulu resin. “Haree progresu no dezenvolvimentu iha Timor-Leste hanesan orgullu boot ida. Haksolok tebes haree nasaun ida-ne’ebé hamriik hafoin momentu sira ne’ebé dezafiadór tebes,” nia afirma.

UNAMET hanesan misaun Nasoins Unidas ne’ebé harii atu organiza no superviziona Timor-Leste nia referendu autodeterminasaun iha tinan 1999. Misaun ne’e inklui observadór internasionál sira no forsa seguransa ida atu garante prosesu pás. Tuir violénsia ne’ebé akontese hafoin referendu, INTERFET, forsa multinasionál ida ne’ebé lidera husi Austrália, ne’ebé hetan autorizasaun husi Konsellu Seguransa ONU nian atu restaura pás no seguransa. INTERFET marka prezensa iha fulan-setembru tinan 1999 to’o fulan-fevereiru tinan 2000, no inklui kontinjente sira husi nasaun oioin, inklui Nova Zelándia, Portugál, Reinu Unidu, no Estadus Unidus, no nasaun sira-seluk.

Vizita husi delegasaun ne’e, inklui veteranu husi ramu oioin forsa armada sira Nova Zelándia nian ne’ebé mai Timor-Leste entre tinan 1999 no 2002, halo hela dokumentu atu hala’o filme dokumentáriu ida, ho eis-aprezentadór TV3, Mike McRoberts, hanesan narradór. Dokumentáriu ne’e hakarak atu kapta experiénsia no istória signifikativu sira husi veteranu sira, inklui insidente trájiku iha Suai ne’ebé envolve Leonard Manning, Neozelandés dahuluk ne’ebé mate iha misaun dezde Funu Vietname nian.”