Governu Timor-Leste

Entre loron 22 no 25 fulan-jullu tinan 2024, realiza asaun Formasaun ba Formadores faze daruak Planu Étika iha Desportu Komunidade País Lian Portugés (PED CPLP II) iha instalasoins Cruz Vermelha de Timor-Leste. Eventu ida-ne’e sura ho partisipasaun husi profesores edukasaun fízika na’in-40, treinadores no formadores federasaun desportiva husi modalidade oin-oin, inklui atletizmu, taekwondo, xadrés no desportu paralímpiku.

Sesaun abertura ne’e prezide husi Ministru Juventude, Desportu, Arte no Kultura interinu no Sekretáriu Estadu Arte no Kultura, Jorge Soares Cistovão. Iha ninia intervensaun, Ministru interinu subliña importánsia husi étika desportiva, hodi enkoraja partisipante sira atu absorve koñesimentu ne’ebé tranzmite hodi aplika iha sira-nia prátika profisionál no divulga valór sira-ne’e ba alunu sira. Jorge Soares Cristovão destaka mós relevánsia formasaun nian hanesan gia esensiál ida ba Jogu Desportivu CPLP XII, ne’ebé Timor-Leste sei sai uma-na’in iha tinan 2025.

Formasaun ne’e realiza husi José Lima, Koordenadór PED CPLP II, no husi formadór portugés André Carvalho, sira na’in-rua ne’e espesialista iha área étika desportiva. Programa ne’e inklui temas hanesan promosaun komportamentu étiku, prevensaun konflitu no kriasaun ba ambiente ida ne’ebé pozitivu no inkluzivu iha desportu.

João M. Rodrigues, Diretór-Jerál Desportu nian, ko’alia-liu ba importánsia husi kapasitasaun ida-ne’e ba preparasaun rekursus umanus, inklui treinadór, profesór no árbitru sira, haree ba Jogus CPLP nian tuirmai, ne’ebé ajenda ba loron 17 to’o 27 fulan-jullu tinan 2025. “Formasaun ida-ne’e importante tebes hodi garante katak ema hotu ne’ebé envolve aliña ho prinsípius étikus ne’ebé gia desportu ne’e,” afirma João Rodrigues.

Planu Étika iha Desportu Komunidade País Lian Portugés (PED CPLP II) hanesan inisiativa ida ne’ebé ho objetivu atu promove étika no valores iha desportu entre país sira CPLP nian. Programa ne’e ho objetivu atu kapasita treinadór, edukadór no profisionál sira seluk ne’ebé liga ho desportu, hodi fornese ba sira ferramenta atu implementa prátika étika no komportamentu responsavel sira. Formasaun ne’e inklui módulus kona-ba importánsia integridade, fair play, inkluzaun no prevensaun ba komportamentu antidesportivus, ho objetivu atu kria kultura desportiva ida ne’ebé saudavel no sustentavel.

Timor-Leste sei sai uma-na’in ba Jogu Desportivu CPLP XII iha fulan-jullu tinan 2025, eventu multidesportivu ne’ebé sei reúne partisipantes ho idade menus husi 16 husi país CPLP sia. Iha inísiu ne’ebá prevee ba tinan 2020, maibé eventu ne’e adia tiha fali tanba pandemia COVID-19.