Governu Timor-Leste

Ministru Interiór, Francisco da Costa Guterres, asina Akordu Parseria ida ho UN Women, ho objetivu atu avansa ajenda Feto, Dame no Seguransa iha Timor-Leste. Akordu ida-ne’e, selebra iha loron 23 fulan-jullu tinan 2024, marka pasu signifikativu ida iha implementasaun efikás Planu Asaun Nasionál 1325 (NAP 1325) nian ba tinan 2024-2028, ne’ebé hetan aprovasaun ofisiál hosi Konsellu Ministrus iha inísiu tinan ida-ne’e. 

Durante serimónia asinatura, Ministru Interiór destaka importánsia hosi parseria ida-ne’e, hodi hateten katak hametin parseria entre Ministériu Interiór no UN Women importante tebes ba susesu implementasaun Planu Asaun Nasionál 1325. Akordu ida-ne’e reflete kompromisu ne’ebé la nakdoko hosi Governu hodi garante katak feto sira dezempeña papél sentrál ida iha esforsu harii-dame no seguransa iha Timor-Leste. Hamutuk, ita harii sosiedade ida ne'ebé seguru no ekuitativu liu. 

Parseria ne’e ho objetivu atu hametin kapasidade estrutura Planu Asaun Nasionál 1325 ba implementasaun, koordenasaun no monitorizasaun ida ne’ebé efetivu ba ajenda Feto, Dame no Seguransa, fó apoiu tékniku hodi envolve juventude no komunidade lokál sira iha prevensaun konflitu iha forma naun violentu no iha koezaun sosiál, ho énfaze partikulár ba feto sira, no promove feto sira-nia partisipasaun no lideransa iha prevensaun no rezolusaun konflitu, ho hametin prosesu harii-dame bazeia ba komunidade no sensivel ba jéneru.

Xefe Gabinete UN Women iha Timor-Leste, Nishtha Satyam, mós hato’o ninia entuziazmu ba akordu ne’e, hodi haktuir katak parseria ida-ne’e hanesan avansu boot ida iha ita-nia esforsu koletivu ho Ministériu Interiór hodi promove igualdade jéneru no pás iha Timor-Leste.