Governu Timor-Leste

Banku Sentrál Timor-Leste (BCTL - sigla iha lian portugés) no Banku Nasionál Kamboja (NBC – sigla iha lian inglés), iha segunda-feira, loron 22 fulan-jullu tinan 2024, asina memorandu entendimentu ida ho objetivu atu hamutuk hametin abilidade téknika sira-nia tékniku kona-ba operasaun bankária, rede pagamentu, inovasaun dijitál, prosedimentu supervizaun, ambiente finanseiru no kapitál umanu.

Eventu ne’e, marka sorumutu bilaterál dahuluk entre banku sentrál rua, sura ho prezensa husi Chea Serey, Governadora NBC, no Hélder Lopes, Governadór BCTL, no hala’o iha Otél Sofitel, iha Phnom Penh, Kamboja. Iha sorumutu, governadór sira ne’e diskute no troka opiniaun kona-ba situasaun ekonómika, polítika monetária no prosesu evolusaun setór bankáriu nasaun rua ne’e nian.

Governadór sira ne’e fahe sira-nia esperiénsia no estratéjia, ho intensaun atu fó benefísiu ba malu ba banku sentrál sira nasaun rua nian. Sorumutu bilaterál dahuluk ho objetivu atu kontribui ba dezenvolvimentu setór bankáriu nasionál Timor-Leste no Kamboja. Inisiativa husi sorumutu ne’e hakarak atu hametin kooperasaun iha operasaun banku sentrál, integra koneksaun pagamentu, promove inovasaun finanseira dijitál, asegura supervizaun bankária, diversifika ambiente finanseiru no dezenvolve rekursus umanus iha setór ne’e.

Ekipa téknika husi banku rua ne’e sei hametin kooperasaun liuhosi troka opiniaun ho regulár, fahe informasaun no dadus relasiona ho ekonomia no finansas, nune’e mós esperiénsia no koñesimentu tékniku. Governadór na’in-rua mós konkorda atu hala’o sorumutu anuál no kompromete atu kontinua hametin no habelar kooperasaun finanseira ne’ebé abranjente, ho objetivu atu hetan rezultadu ne’ebé signifikativu.