Banku Sentrál Timor-Leste Lansa Mákina Foun hodi Troka Osan-Tahan ba Osan-Besi
Banku Sentrál Timor-Leste (BCTL, sigla iha lian portugés) halo aprezentasaun no demonstrasaun ida kona-ba utilizasaun mákina foun ne’ebé atu troka osan-tahan dolar amerikanu ba osan-besi, iha eventu ida ne’ebé realiza iha loron 19 fulan-jullu tinan 2024, iha instalasaun Banku Sentrál nian. 
Lansamentu ba mákina ne’e lidera husi Governadór Banku Sentrál, Helder Lopes, akompaña husi Vise-Governadora, Sara Lobo Brites, ne’ebé foka-liu importánsia teknolojia foun ida-ne’e atu permite komersiante sira no públiku ein jerál hodi troka ho fasil osan-tahan dolar amerikanu ba osan-besi. 
Eventu ne’e konta ho prezensa husi loja no restaurante na’in sira, ne’ebé hatudu sira-nia entuziazmu ho ferramenta foun ne’e, no promete atu hadi’a efisiénsia iha sira-nia operasaun loroloron.
