Lansamentu ba Kursu Mestradu Polítika Públika iha UNTL
![452370474_354467174376284_2899472779026902735_n](https://timor-leste.gov.tl/wp-content/uploads/2024/07/452370474_354467174376284_2899472779026902735_n-300x217.jpg)
Universidade Nasionál Timor Lorosa’e (UNTL), iha loron 23 fulan-jullu tinan 2024, lansa kursu foun mestradu iha área Polítika Públika. Serimónia inaugurasaun ne’e hala’o iha instalasaun UNTL Kaikoli, no hetan partisipasaun husi Primeiru-Ministru, Kay Rala Xanana Gusmão, no Reitór UNTL, João Martins.
Primeiru-Ministru subliña importánsia husi kursu foun ida-ne’e atu dezenvolve kapasidade krítika no analítika, ne’ebé esensiál ba formasaun futuru lider sira Timor-Leste nian. Iha nia intervensaun, hateten: “UNTL nia misaun mak atu kria no forma futuru lider sira Timor-Leste nian. Kursu ida-ne'e mak esforsu fundamentál ida iha formasaun jerasaun foun ida, tanba ita-nia país presiza ema ne’ebé iha kapasidade atu dezenvolve nasaun no atu mantein nafatin ita-nia eroi sira-nia mehi.”
Reitór João Martins hato’o ninia satisfasaun ho lansamentu ba kursu ne’e, salienta katak tinan barak ona UNTL hein atu estabelese programa mestradu ne’ebé relevante ba Timor-Leste. Kursu ida-ne’e sei fó formasaun ba espesialista sira iha área polítika públika, ne’ebé sei fó apoiu ba desizaun sira Governu nian iha futuru.
Korpu dosente Fakuldade Siénsia Polítika no Sosiál kompostu husi profesór na’in-15 ho nivel doutoramentu, inklui balun husi universidade internasionál, hanesan Portugál no Indonézia. Teze mestradu hotu-hotu tenke hakerek iha lian Portugés no Inglés, tanba ne’e, molok ne’e UNTL hala’o kursu intensivu lian Portugés, ho durasaun fulan tolu.
Kursu ho durasaun tinan rua, daudaun ne’e iha alunu ne’ebé matrikula ona hamutuk na’in-25 no sei hanorin iha kalan, hosi tuku 8 kalan to’o tuku 9 kalan.