Timor-Leste no Koreia Súl asina memorandu entendimentu ba kooperasaun iha dezenvolvimentu rurál
![2-004](https://timor-leste.gov.tl/wp-content/uploads/2024/07/2-004-300x200.jpg)
Vise-Primeiru-Ministru, Ministru Koordenadór Asuntus Sosiais no Ministru Dezenvolvimentu Rurál no Abitasaun Komunitária, Mariano Assanami Sabino, iha loron 19 fulan-jullu tinan 2024, asina memorandu entendimentu ida ho Ministru Interiór no Seguransa Governu Repúblika Koreia nian ho objetivu atu halo kooperasaun ba dezenvolvimentu inisiativa Saemaul Undong. Asinatura ba memorandu ida-ne’e hanesan parte ida husi Vise-Primeiru-Ministru nia vizita ofisiál ba Repúblika Koreia.
Programa Saemaul Undong, ne’ebé lansa iha Koreia Súl iha dékada 1970, ho objetivu atu hadi’a infraestrutura lokál, hasa’e produtividade agríkola no promove dezenvolvimentu sosioekonómiku komunidade nian. Modelu dezenvolvimentu rurál ida-ne’e hetan ona rekoñesimentu internasionál ba ninia susesu hodi transforma komunidade rurál sira liuhosi auto sufisiénsia no kooperasaun.
Durante vizita ne’e, Vise-Primeiru-Ministru ho delegasaun nasionál halo vizita ba instituisaun no empreza oioin, hodi destaka empreza HAECHUN Co. Ltd., ne’ebé hatudu interese atu investe iha Timor-Leste, liuliu iha área enerjia renovável. Delegasaun ne’e mós vizita Sentru Formasaun Teknolojia Agríkola Busan, Eco Delta Smart City, Eco Delta Smart Village, SK Forest no Muzeu Saemaul Undong.
Aleinde Vise-Primeiru-Ministru, delegasaun ne’e kompostu mós husi Vise-Ministru Administrasaun Estatál, Jacinto Rigoberto, Sekretáriu Estadu Florestas, Fernandinho Vieira, Prezidente Autoridade Munisipál Dili, Gregório Saldanha, Prezidente Autoridade Munisipál Ataúro, Mateus Belo, Diretór-Jerál Dezenvolvimentu Rurál no Abitasaun Komunitária, Filipe Cardoso, no husi Diretór-Jerál Programa Nasionál Dezenvolvimentu Suku no tékniku sira seluk.