Governu Timor-Leste

Ministru Negósius Estranjeirus no Kooperasaun, Bendito dos Santos Freitas, partisipa iha Sorumutu Ordinária Konsellu Ministrus Comunidade dos Países de Língua Portuguesa (CPLP) nian, ne’ebé realiza iha São Tomé e Príncipe, iha loron 19 fulan-jullu tinan 2024. Sorumutu ida-ne’e prezide husi Ministru Negósius Estranjeirus, Kooperasaun no Komunidade São Tomé e Príncipe, Gareth Guadalupe, no husi Sekretáriu Ezekutivu CPLP, Zacarias Albano da Costa, iha prezensa Ministrus Negósius Estranjeirus husi país membrus CPLP nian.

Tema sentrál husi debate jerál ministeriál mak “Impaktu Mobilidade Juveníl iha Espasu CPLP ba Fortalesimentu Ekonomia Sustentavel”. Durante sorumutu ne’e, Estadus-membrus asina Karta ida kona-ba Direitus no Prinsípius iha Ambiente Dijitál, ho objetivu atu promove sustentabilidade no aumenta produtividade liuhusi ekonomia dijitál, nomos hodi asegura protesaun ba dadus pesoais no seguransa iha komunikasaun via ‘internet’. 

Ministru Bendito dos Santos Freitas salienta importánsia husi mobilidade juveníl, hodi afirma katak “juventude maka rikusoin fundamentál ida ba dezenvolvimentu sustentavel. Joven sira maka ajente ba mudansa, lori ideia inovativu no solusaun kriativa ba dezafius ambientais, sosiais no ekonómikus ne’ebé ita hasoru.” Ko’alia-liu mós impaktu pozitivu husi mobilidade joven sira nian iha CPLP, hodi hateten katak “mobilidade joven sira nian iha ita-nia Komunidade iha impaktu pozitivu tebes no palpavel (ne’ebé ita bele sente ou haree) ba fortalesimentu sustentabilidade ekonómika iha ita-nia sosiedade sira.”

Iha sorumutu ne’e, ko’alia mós kona-ba inisiativa sira ne’ebé relasiona ho adosaun enerjia renovável no kooperasaun hodi kombate alterasaun klimátika. Ministru Bendito dos Santos Freitas reafirma Timor-Leste nia kompromisu ba inisiativa sira-ne’e, destaka katak “CPLP, nu’udar organizasaun, iha papél fundamentál ida hodi dinamiza inisiativa sira ne’ebé promove moris-di’ak juventude nian ho hanoin ba dezenvolvimentu sustentável sira-nia ekonomia.”  

Iha tempu hanesan, Ministru Negósius Estranjeirus no Kooperasaun hala’o mós sorumutu bilaterál ho ninia omólogu CPLP balun. Ho Ministru Negósius Estranjeirus Portugál nian, Paulo Rangel, ko’alia kona-ba Programa Kooperasaun Estratéjika no ko’alia kona-ba problema ne’ebé sidadaun timoroan sira hasoru bainhira halo viajen ba Portugál. Iha sorumutu ho Ministru Relasoins Esteriores Brazíl nian, Mauro Vieira, ko’alia kona-ba kooperasaun iha área dezenvolvimentu rekursus umanus. Ikusliu, ho Ministru Relasoins Esteriores Angola nian, Téte António, ko’alia kona-ba preparasaun ba vizita ofisiál prezidente Angola nian, João Lourenço, ba Timor-Leste, ne’ebé prevee ba tinan 2025. 

Konsellu Ministrus CPLP tuirmai sei hala’o iha loron 17 fulan-jullu tinan 2025, iha Giné-Bissau.

CPLP kompostu hosi Angola, Brazil, Cabo Verde, Giné-Bissau, Portugál, Mosambike, São Tomé e Príncipe, Giné Ekuatoriál no Timor-Leste.

Ministru Bendito dos Santos Freitas hakotu ninia intervensaun ho fó felisitasaun ba CPLP, ne’ebé selebra ninia aniversáriu ba dala ruanulu-resin-ualu iha tinan ida-ne’e, afirma katak “hanesan momentu selebrasaun no reflesaun nian ida kona-ba importánsia atu iha no kontinua hamutuk, unidu husi lian portugés no nune'e sai riku ba diversidade étnika no kulturál ita-nia povu nian.”