Governu Timor-Leste

Ministériu Solidariedade Sosiál no Inkluzaun, serbisu hamutuk ho Fundu Nasoins Unidas ba Labarik (UNICEF) no The Asia Foundation, iha loron 18 fulan-jullu tinan 2024 lansa ona Prosedimentu Operasionál Padraun rua ba protesaun labarik no foin-sa’e sira nune’e mós hodi koordena resposta ba violénsia jéneru. Eventu ne’e hala’o iha Sala Konferénsia Hotel Novo Turismo, Dili. 

Prosedimentu foun sira ne’e hanesan ferramenta prátika ne’ebé ho objetivu atu hadi’a jestaun kazu protesaun ba labarik no violénsia bazeia ba jéneru iha Timor-Leste, tantu iha kontestu regulár nune’e mós iha emerjénsia. 

Durante serimónia lansamentu ne’e, Ministra Solidariedade Sosiál no Inkluzaun, Verónica das Dores, koa’lia-liu importánsia prosedimentu sira ne’e hodi garante jestaun ida ne’ebé efikás no loloos iha kazu protesaun labarik no violénsia bazeia ba jéneru iha ita-nia nasaun. 

Reprezentante UNICEF iha Timor-Leste, Patrizia DiGiovanni, subliña importante tebes prosedimentu ba jestaun kazu protesaun labarik no foin-sa’e sira, no afirma katak ne’e hanesan ferramenta prátika iha forsa traballu servisu sosiál nia liman, ne’ebé bele akompaña kada pasu  ho konfiansa no klareza, to’o labarik ne’e seguru. DiGiovanni mós realsa importánsia prosedimentu operasionál padraun hodi koordena no responde ba violénsia jéneru, ne’ebé kontribui ba implementasaun tomak Lei kona-ba protesaun Labarik no Foin-sa’e sira iha Perigu, ne’ebé promulga ona iha tinan 2023. 

Iha eventu ne’e, UNICEF entrega komputadór portatíl 36 no impresora rua ba Ministériu Solidariedade Sosiál no Inkluzaun, hodi fó ba traballadór servisu sosiál atu sira bele utiliza tomak sistema jestaun kazu protesaun labarik dijitál Primeru, ne’ebé adota iha inísiu tinan ida ne’e. Doasaun ida ne’e ho objetivu atu hasa’e formasaun ba ajentes protesaun labarik, pontu fokál violénsia bazeia ba jéneru no departamentu protesaun labarik nian. 

Esforsu kolaborativu ida ne’e hetan apoiu finanseiru husi Governu Austrália no Gabinete Asisténsia Umanitária USAID nian.