Governu Timor-Leste

Iha loron 19 fulan-jullu tinan 2024, Governu Timor-Leste, serbisu hamutuk ho Aliansa Mundiál ba Vasina no Imunizasaun (Gavi), Governu Australianu, Fundu Nasoins Unidas ba Infánsia (UNICEF) no Organizasaun Mundiál Saúde (OMS), lansa ofisiálmente vasina kontra papillomavirus umanu (HPV, sigla iha lian inglés) hodi prevene kankru serviks (úteru) ba labarik-feto sira ho idade 11 to’o 14. 

Serimónia lansamentu ne’e hala’o iha Palásiu Prezidensiál Nicolau Lobato, Dili, iha ámbitu selebrasaun Loron Nasionál Saúde ba da-6, ne’ebé partisipa mós husi Primeiru-Ministru, Kay Rala Xanana Gusmão. Primeiru-Ministru agradese ba OMS, UNICEF, Governu Australianu no Ministériu Saúde ba esforsu hamutuk ne’ebé posibilita introdusaun ba vasina importante ida-ne’e. 

Xefe Governu afirma tan katak, introdusaun vasina kontra HPV ne’e hanesan marka signifikativu ida ba saúde públika iha Timor-Leste no hateten presiza kooperasaun entre ministériu no entidade oioin iha rekolla dadus ba susesu implementasaun inisiativa ida ne’e nian.

Lansamentu vasina ne’e sei akompaña husi kampaña nasionál ida iha semana rua nia laran, sei hahú iha loro 8 fulan-agostu oin mai, ho objetivu atu vasina labarik-feto rihun 15 hahú husi idade 11. Vasina ne’e sei integra iha sistema vasinasaun rotina iha unidade saúde, atu nune’e reforsa programa imunizasaun iha país. 

Governu mós sei halo esforsu iha tinan hirak tuirmai hodi aumenta kobertura saúde iha área rurál, hanesan konstrusaun klínika no rezidénsia ba médiku sira, atubele fornese asisténsia médika ba ema hotu.

Reprezentante OMS iha Timor-Leste, Arvind Mathur, hateten katak introdusaun vasina kontra HPV ne’e hanesan konkista signifikativa ida la’ós de’it iha programa imunizasaun iha Timor-Leste, maibé mós iha ninia kompromisu ho prevensaun ba kankru serviks. Nia mós ko’alia-liu katak formasaun extensiva ne’ebé fó ba prestadores kuidadu saúde nian iha nivel hotu-hotu no serbisu ne’ebé realiza ho profesores iha sesaun informasaun nian iha eskola no komunidade sei sai fundamentál hodi aumenta kobertura vasina. 

Eventu ne’e konta mós ho partisipasaun husi autoridade oioin, inklui Vise-Ministru Fortalesimentu Institusionál, José dos Reis Magno, Vise-Ministru Operasionalizasaun Ospitalár, Flávio Brandão Mendes de Araújo, Ministra Solidariedade Sosiál no Inkluzaun, Verónica das Dores, Embaixadór Japaun iha Timor-Leste, Kimura Tetsuya, no Reprezentante UNICEF iha Timor-Leste, Patrizia DiGiovanni.

Ho apoiu husi Gavi, disponibiliza ona vasina doze 41.000 kontra HPV ba faze inisiál kampaña ne’e. Aleinde ne’e, doze 38.370 sei fornese husi Governu Australianu hodi garante kontinuidade vasinasaun iha fulan neen tuirmai.

Ministériu Saúde, serbisu hamutuk ho OMS no UNICEF, sei realiza sesaun intensiva ba sensibilizasaun komunitária no mediátika hodi aumenta konxiénsia públika kona-ba vasina kontra HPV no garante katak informasaun ne’ebé loloos no prova tuir sientífika sei publika.