Governu Timor-Leste

Ministra Solidariedade Sosiál no Inkluzaun, Verónica das Dores, ne’ebé akompaña husi Vise-Ministra Solidariedade Sosiál no Inkluzaun, Céu Brites, no husi Sekretáriu Estadu ba Protesaun Sivíl, Domingos Mariano Reis, partisipa iha serimónia selebrasaun aniversáriu ba da-25 prezensa Programa Alimentár Mundiál (PAM) iha Timor-Leste. Selebrasaun ne’e realiza iha loron 17 fulan-jullu tinan 2024, iha instalasaun foun PAM nian iha Dili. 

Programa Alimentár Mundiál halo tinan 25 serbisu iha Timor-Leste, durante serbisu sira ne’e evolui ona asisténsia umanitária emerjénsia hodi promove inisiativa ba dezenvolvimentu sustentavel, nutrisaun no seguransa ai-han. 

Serimónia ne’e konta ho prezensa husi Prezidente Repúblika, José Ramos-Horta, ne’ebé hamutuk ho membrus Governu, reprezentante husi korpu diplomátiku no parseiru dezenvolvimentu sira, ofisialmente inaugura instalasaun foun PAM nian iha Timor-Leste, Alba Cecilia Garzon, simu Medalla Méritu, hodi rekoñese ninia kontribuisaun exesionál sira ba dezenvolvimentu iha Timor-Leste, liuliu iha área seguransa ai-han, nutrisaun no protesaun sosiál.