Interlokutór iha diskusaun Greater Sunrise, Agio Pereira, hasoru-malu ho reprezentante empreza petrolífera INPEX
Ministru Prezidénsia Konsellu Ministrus no interlokutór iha diskusaun Greater Sunrise, Agio Pereira, ohin loron 18 fulan-jullu, iha Darwin, hasoru-malu ho Chris Wilson, Vise-Prezidente Ezekutivu Operasaun empreza petrolífera japoneza INPEX nian. 
Hafoin enkontru foin lalais ne’e iha Dili, enkontru daruak ne’e ho objetivu atu kontinua halo diálogu ho INPEX, ne’ebé bele sai fatór importante iha dezenvolvimentu Greater Sunrise, hodi halo projetu ne’e sai realidade, ba interese di’ak liu nasaun rua ne’ebé envolve.
Ministru destaka katak abertura ba eskritóriu ne’e reprezenta pasu pozitivu ba koordenasaun ida ne’ebé besik liután ho parte interesadu sira hotu, inklui ANP, Timor Gap, Governu, liuhosi Ministru Petróleu no Rekursu Minerais, Francisco da Costa Monteiro, no Ministru Ministru Agio rasik, hanesan Reprezentante Espesiál Governu Timor-Leste ba Greater Sunrise.
Ministru Agio subliña katak Timor-Leste kompromete atu hetan solusaun ida ne’ebé permite dezenvolvimentu Greater Sunrise ho ligasaun direta mai Timor-Leste. Austrália iha projetu barak ne'ebé hanesan, maibé ba Timor-Leste, ida-ne'e hanesan oportunidade úniku ida atu hala'o projetu ida ho magnitude ida-ne'e, ho benefísiu signifikativu ba dezenvolvimentu nasaun.
Agio Pereira rekoñese esperiénsia valioza husi INPEX, ne’ebé enfrenta ona dezafiu iha dezenvolvimentu projetu LNG nian ida, no haktuir katak empreza ne’e iha buat barak atu hanorin ba Timor-Leste. Nia hato’o Timor-Leste nia interese atu servisu hamutuk ho INPEX no Japaun iha projetu ida-ne’e, hodi konvida no enkoraja responsavel sira petrolíferu nian atu hanoin kle’an kona-ba oinsá sira bele ajuda Timor-Leste hodi konkretiza dezenvolvimentu Greater Sunrise. 
Ministru hato’o esperansa katak implementasaun gazodutu ba Timor-Leste sei dudu nasaun, hodi promove investimentu iha rai-laran no hatudu katak Timor-Leste iha kapasidade atu hala’o projetu boot sira. Prioridade Governu nian mak atu avansa dezenvolvimentu Greater Sunrise hodi maximiza kriasaun empregu iha rai laran, la’o tuir Programa Governu Konstitusionál IX nian.
Aleinde ne’e, Governu Timor-Leste haree katak gazodutu hanesan oportunidade di’ak tebes ida ba dezenvolvimentu sustentável ba tempu naruk. Kestaun seluk mak asinatura tratadu ho Austrália, Timor-Leste hetan área marítima kuaze 20.000 km, rejiaun ida ne’ebé luan tebes ba indústria peskas.
Timor-Leste nia ekonomia bele sai ekonomia ida ne’ebé diversifikada no ita hein katak Governu Japaun mós bele ajuda ita iha área ida ne’e, atu nune’e ita bele dezenvolve infraestruturas ne’ebé halo ida ne’e sai posivel. Ezemplu, ligasaun estrada entre kosta leste no súl, ne'ebé liga Natarbora, aeroportu no infraestrutura sira seluk hanesan portu, eziste ona, harii iha projetu dezenvolvimentu kosta súl nian, ho títulu “Projetu Tasi Mane ”.
Ministru mós hateten katak Governu hein atu avansa dezenvolvimentu kosta súl nian, iha kolaborasaun ho Austrália, liuhosi Steve Bracks, Reprezentante Espesiál Austrália ba Projetu Greater Sunrise. Agio Pereira hanoin fali relasaun ne’ebé kleur ona, husikedas tinan 2007, ho Steve Bracks, ne’ebé nu’udar Xefe Estadu ida ne’ebé susesu liu iha Austrália no mós nu’udar asesór ba Primeiru-Ministru Xanana Gusmão, tanba ne’e sira iha relasaun metin.
Ministru hateten katak diskute ona asuntus hotu ho Steve Bracks, no destaka katak Governu Austrália atuál mós apoia tebes Timor-Leste. 
Nia mós destaka katak Primeiru-Ministru Anthony Albanese nu'udar apoiante boot ida ba Timor-Leste nia independénsia. Nia manifesta mós esperansa katak serbisu ho Steve Bracks bele halo diferensa ida hodi aselera dezenvolvimentu iha Greater Sunrise.
Iha sentidu ida-ne'e, nia subliña presiza esperiénsia no konsellu hosi INPEX, empreza ida ho koñesimentu ne'ebé boot no asaun parsiál hosi Governu Japaun. Agio Pereira hanoin fali kona-ba relasaun amizade entre Timor-Leste no Japaun ne’ebé kleur ona, liuliu husikedas krize 1999 no tranzisaun ONU nian, ho JICA sai parseiru ativu no profisionál iha nasaun ne’e.
Iha enkontru ne’e, Ministru Agio espresa katak saida mak Timor-Leste hakarak maka maksimiza kriasaun kampu traballu ba ita-nia país, atu nune’e sustentavel no estavel, no kria oportunidade ba jerasaun foin-sa’e sira. Atu ita kontinua la’o ba oin, ita tenke prepara ita-nia foin-sa’e sira atu dezenvolve espíritu krítiku, tanba ba Governu Timor-Leste, kriasaun ba kampu traballu ne’e importante tebes.
Aleinde Ministru Agio Pereira no Vise-Prezidente INPEX, sorumutu ne’e partisipasaun mós husi Ika Moniz, Asesora Seniór no Asesora ba Polítika no Relasaun Públika iha Gabinete Ministru Prezidénsia Konsellu Ministru, no Steve Ovenden, Takuya Sugawara no Ricard Finch, dirijentes INPEX nian.
