Governu Timor-Leste

Fó sai ohin husi Sekretáriu Estadu Komunikasaun Sosiál, Expedito Dias Ximenes, ne’ebé akompaña husi Ministru Administrasaun Estatál, Tomás do Rosário Cabral, no Kardeál Dom Virgílio do Carmo da Silva, inísiu husi prosesu akreditasaun jornalista ba vizita apostólika Sua Santidade Papa Francisco nian. Vizita ne’e marka ona ba loron 9 to’o 11 fulan Setembru tinan 2024. Pedidu akreditasaun tenke haruka uza formuláriu ne’ebé disponivel iha Portál Governu nian, iha https://timor-leste.gov.tl/?pp. 

Durante konferénsia imprensa ne’ebé hala’o iha Sekretariadu Komisaun Organizadora, Sekretáriu Estadu subliña importánsia vizita papál ne’e hanesan momentu uniaun nasionál ida, ne’ebé haree-liu ba pás, solidariedade no fraternidade ne’ebé simboliza iha vizita ne’e ba povu Timor-Leste. “Ba povu Timor-Leste, prezensa Santu Padre nian nu’udar sinál bénsaun no esperansa, momentu ida ne’ebé hein ho esperansa boot tebe-tebes”, afirma Expedito Dias Ximenes.

Prosesu akreditasaun ne’e esensiál atu garante kobertura jornalístika ida ne’ebé organizada no seguru durante vizita Papa Francisco nian. Sekretáriu Estadu ne’e esplika katak prosedimentu ida-ne’e ho objetivu atu asegura ambiente ida ne’ebé kontroladu no efisiente, no garante seguransa ba partisipante sira hotu no integridade ba informasaun sira ne’ebé divulga. 

Jornalistas interesadu tenke kompleta formuláriu espesífiku ida ne’ebé disponivel iha Portál Governu to’o loron 16 fulan-agostu tnan 2024. Formuláriu ne’e disponivel iha lian tetum, portugés no inglés no tenke submete kompletu no akompaña ho dokumentus ne’ebé presiza. Karik iha dúvida, jornalistas bele kontaktu Sekretariadu Komisaun Organizadora liuhusi e-mail gacg.covss.papa.tl@gmail.com.

Hafoin simu  pedidu, ekipa husi Sekretariadu sei hala’o verifikasaun detallada ida ba dadus no dokumentus ne’ebé submete ona, inklui autentisidade ba informasaun ne’ebé fornese ona. Tanba limitasaun espasu iha eventu barak husi programa vizita papál, bele iha limitasaun ba númeru jornalistas  akreditadu iha kada eventu. 

Aleinde prosesu akreditasaun, anunsia mós lansamentu ba programa espesiál TALK SHOW ida iha Rádiu no Televizaun Timor-Leste (RTTL). Programa ne’e ho títulu ‘Preparasaun ba Vizita Apostólika Sua Santidade Papa Francisco mai Timor-Leste’, ne’ebé sei hahú iha inísiu fulan-agostu ho objetivu atu informa no prepara públiku ba momentu istóriku ida-ne’e. Iha atividade ne’e sei diskute mós preparativus ne’ebé realiza husi Komisaun Organizadora, inklui lojístika, seguransa no programasaun serimónia, ho partisipasaun figuras importantes ne’ebé envolve iha organizasaun eventu refere.

Governu Timor-Leste kontinua serbisu maka’as hodi kolabora ho Vatikanu, Igreja lokál no instituisaun sira seluk hodi garante susesu no seguransa ba vizita papál.