Semináriu Internasionál hodi diskute Padraun Kompeténsia ba Sistema Kualifikasaun Nasionál
Iha loron 11 no loron 12 fulan-jullu tinan 2024, Ministériu Ensinu Superiór, Siénsia no Kultura (MESSK), liuhusi Diresaun-Jerál Ensinu Superiór no Siénsia parseria ho Komisaun Koordenadora ba Universidade no Institutu sira (KUIS), hala’o semináriu Internasionál kona-ba Sistema Kualifikasaun Nasionál Timor-Leste nian (SKN-TL), iha Hotel Novo Turismo, Dili. 
Ho tema “Dezenvolve no Valida Padraun Kompeténsia ba SKN-TL”, eventu ne’e halibur espesialista nasionál no internasionál sira husi área formasaun rekursu umanu no dezenvolve sistema integradu, ne’ebé aliñadu ho nesesidade merkadu traballu nian. 
Semináriu ne’e ho objetivu atu diskute, dezenvolve no valida Padraun Kompeténsia ba Sistema Nasionál Kualifikasaun Timor-Leste, ne’ebé komisaun revizaun identifika ona iha faze hirak liubá. Komisaun traballu ne’ebé responsavel ba revizaun ida-ne’e kobre setór rua: Setór Akadémiku no Setór Tékniku-Vokasionál, ho prioridade atu analiza nível kualifikasaun no área aprendizajen, ne’ebé rezulta iha desizaun atu hamenus nível kualifikasaun husi Nivel 10 ba Nivel 8 no simplifika área aprendizajen ba tolu: Koñesimentu, Kompeténsia, Autonomia no Responsabilidade. 
Iha sesaun abertura, iha palestra ida ne’ebé hato’o hosi Primeiru-Ministru, Kay Rala Xanana Gusmão, ne’ebé destaka “importánsia formasaun no kapasitasaun ba rekursu umanu, no produsaun abilidade ba susesu polítiku no ekonómiku nasionál”. Xefe Governu ko’alia-liu misaun husi universidade sira atu prepara jerasaun futuru lider sira ne’ebé sei jere país no enkoraja instituisaun edukasionál sira atu kontinua hadi’a sira-nia intervensaun, atu nune’e sistema edukativu hahú husi ensinu báziku to’o ensinu superiór bele kumpre papél ida-ne’e, tanba edukasaun la’ós de’it servisu ida, maibé vokasaun ka misaun ida atu serbí no tau-matan. 
Iha loron daruak semináriu nian, partisipante sira envolve iha sesaun diskusaun no validasaun ba deskritór kompeténsia sira ne’ebé define ona ba Nivel 8 husi SKN-TL, ne’ebé fahe ba grupu rua: Ensinu Superiór no Ensinu no Formasaun Tékniku no Profisionál (TVET).
Eventu ne’e hetan partisipasaun husi Ministru Ensinu Superiór, Siénsia no Kultura, José Honório, dirijente no tékniku sira husi MESSK, no mós reprezentante husi instituisaun oioin hanesan INDMO, ANAAA, SEFOPE, CCI-TL, no reitór/prezidente husi instituisaun ensinu superiór sira.
