Governu prepara Planu Asaun hodi Reforsa Luta Kombate Ra’es-badak (Stunting)
Vise-Primeiru-Ministru no Ministru Koordenadór Asuntus Sosiál, Mariano Assanami Sabino, ne’ebé akompaña husi Vise-Primeiru-Ministru no Ministru Koordenadór Asuntus Ekonómikus, Francisco Kalbuadi Lay, ho objetivu atu diskute no aprova Planu Asaun Nasionál Nutrisaun Multisetoriál hodi Kombate ra’es-badak (stunting) 2024-2030, ne’ebé koñesidu ho PANKOS. Planu ida-ne’e sei submete ba Konsellu Ministrus hodi hetan aprovasaun. Sorumutu ne’e hala’o iha loron 9 fulan-jullu tinan 2024, iha Auditóriu Kay Rala Xanana Gusmão, iha Ministériu Finansas, Dili. 
Durante sesaun nivel ministeriál ne’e, Diretór Ezekutivu Unidade Misaun Kombate Stunting (UNMICS, akrónimu iha lian portugés) aprezenta ona PANKOS, hodi diskute ninia importánsia estratéjika ne’ebé aliña ho Dekretu-Lei n. 91/2022, Planu Estratéjiku Dezenvolvimentu Nasionál (PED 2011-2030), no Planu Asaun Nasionál hodi Halakon Hamlaha iha Timor-Leste (PANHAMTIL akrónimu iha lian portugés). 
Sorumutu ne’e mós hetan partisipasaun husi Ministra Saúde, Ministra Solidariedade Sosiál, Ministru Komérsiu no Indústria, Ministru Justisa, Vise-Ministru Obras Públikas, Sekretáriu Estadu Pekuária ne’ebé reprezenta Ministru Agrikultura, Pekuária, Peska, no Florestas, Ministru Planeamentu no Investimentu Estratéjiku, Sekretáriu Estadu Ensinu Sekundáriu Jerál no Ensinu Sekundáriu Tékniku-Vokasionál, Sekretáriu Estadu Komunikasaun Sosiál, Diretór Ezekutivu CONSSAN-TL, Koordenadór MCAS, ekipa nutrisaun UNICEF no Diretór relevante sira. 
