Governu Timor-Leste

Sekretaria Estadu Igualdade, serbisu hamutuk ho Feto ONU Timor-Leste no Institutu Igualdade (EQI, sigla iha lian inglés), promove semináriu ida durante loron rua ne’ebé foka hodi reforsa monitorizasaun ba progresu Planu Asaun Nasionál Kontra Violénsia Bazeia ba Jéneru (PAN-VBG). Eventu ne’e hala’o iha loron 9 no 10 fulan-jullu, iha Timor Plaza, ne’ebé halibur reprezentantes husi setór oinoin, inklui linã ministeriál, autoridade munisipál, organizasaun sosiedade sivíl no parseiru dezenvolvimentu sira. 

 Serimónia abertura ne’e prezide husi Sekretária Estadu Igualdade, Elvina Sousa Carvalho, ne’ebé akompaña husi Xefe Feto ONU iha Timor-Leste, Amy Nishtha Satyam, no husi Jestora Investigasaun no Parserias Institutu Igualdade, Xian Warner. Eventu ne’e mós apoiu husi KOICA liuhusi Programa Konjuntu “Hamutuk ba Igualdade”. 

Durante semináriu ne’e, estabelese ona objetivu klaru hodi hasa’e kapasidade reporte no monitorizasaun PAN-VBG, ne’ebé aliña ho estrutura ba Marku Monitorizasaun no Avaliasaun Polítikas Públikas. Nune’e mós diskute responsabilidade iha rekolla dadus no estabelese prosesu ne’ebé transparente hodi relata dadus sira ne’e ba Sekretaria Estadu Igualdade, ho objetivu atu kontinua hadi’a implementasaun ba planu nasionál ne’ebé importante ne’e. 

 Sekretária Estadu Igualdade haree liu relevánsia husi semináriu ida-ne’e hodi adapta no melloria estratéjia “papél importante” husi instituisaun sira no akresenta katak “kada instituisaun iha ninia responsabilidade liuliu iha asesu ba justisa, monitorizasaun no defeza”, programa ida-ne’e no “kada parte tenke serbisu hamutuk hodi bele responde ba ita-nia ezijénsia kona-ba oinsá prevene no halakon tipu violénsia saida de’it bazeia ba jéneru iha ita-nia país”.

Eventu ne’e partisipa husi reprezentante husi ministériu 17, munisípiu hotu-hotu, no mós organizasaun sosiedade sivíl no parseiru dezenvolvimentu sira, ema hotu-hotu iha papél atu kolabora ba sistema monitorizasaun ida ne’ebé forte no efisiente hodi kombate ba violénsia bazeia ba jéneru.