Governu Timor-Leste

Governu Japaun, liuhusi Programa Nasoins Unidas ba Dezenvolvimentu (PNUD), iha loron 29 fulan-juñu tinan 2024 aprezenta ba Sekretáriu Estadu Komunikasaun Sosiál Expedito Dias Ximenes, projetu konstrusaun edifísiu foun Rádiu no Televizaun Timor-Leste, EP, (RTTL,EP). 

 Projetu ne’ebé prevee hodi hahú iha tinan ida ne’e, iha orsamentu dolar millaun 5,9, inklui sobu edifísiu atuál no konkluzaun ba edifísiu foun iha tinan 2026. Edifísiu foun ne’e iha auditóriu ida, estúdiu gravasaun no sala ba Jornalista sira. Projetu ne’e mós inklui formasaun téknika hodi dezenvolve kapasidade téknikas no ekipa operasionál RTTL, EP nian. 

 Sekretáriu Estadu Komunikasaun Sosiál konsidera projetu konstrusaun ida ne’e pozitivu tebetebes tanba hadi’a kondisaun traballu no kapasidade operasionál RTTL,EP nian ho signifikativu.

Sorumutuk ne’e marka prezensa husi Prezidente RTTL, EP, José António Belo “TARALEU” no Vise-Reprezentante Rezidente PNUD, Adeline Carrier.

Akordu ba konstrusaun edifísiu foun RTTL ne’e asina iha loron11 fulan-agostu tinan 2023, entre Embaixadór Japaun iha Timor-Leste, Tetsuya Kimura, no Vise-Reprezentante Rezidente PNUD, Adeline Carrier. Serimónia asinatura ne’e, hala’o iha instalasaun Nasoins Unidas iha Dili, konta ho prezensa husi Prezidente Repúblika, José Ramos-Horta, Sekretáriu Estadu Komunikasaun Sosiál, no Koordenadora Rezidente ONU iha Timor-Leste Funmi Balogun.