Ekipa multisetoriál konfirma katak stok ai-moruk iha INFPM sei sufisiente to’o tinan 2025
Asaun inspesaun hamutuk ne’ebé hala’o husi Komisaun Anti korrupsaun (CAC), Komisaun Funsaun Públika (CFP), Inspetór Jerál Estadu (IGE) no Diresaun-Jerál Jestaun Patrimóniu Estadu (DGGPE) horiseik, loron 9 fulan-jullu, konfirma katak stok ai-moruk iha Institutu Nasionál Farmásia no Produtu Médikus (INFPM) sufisiente hodi atende nesesidade nasionál to’o fulan-fevereiru tinan 2025.
Durante inspesaun surpreza ne’ebé hala’o iha tersa ne’e, verifika katak INFPM mantein nivel ai-moruk sufisiente hodi kobre nesesidade saúde iha rai-laran.
Tuir Komisáriu ba Asuntu Dixiplinár KFP nian, Agapito da Conceição, “stok daudaun ne’e korresponde ba 27% husi nesesidade to’o fulan-jullu, no garante abastesimentu to’o fulan-dezembru tinan 2024 no kontinua uza ba fulan janeiru no fulan-fevereiru tinan 2025”. 
Rosário Salsinha Araújo, Diretór-Jerál Prevensaun no Sensibilizasaun CAC, hateten katak INFPM hanesan rekursu importante tebes ida ba Ministériu Saúde, hodi hatudu katak “observasaun direta iha armazen INFPM hatudu kuantidade ai-moruk ne’ebé sufisiente”.
Ai-moruk sira ne’ebé iha armazén INFPM sufisiente atu atende nesesidade nasionál to’o fulan-janeiru ka fulan-fevereiru tinan 2025”, afirma Diretór Ezekutivu INFPM, Brigido Simão Dias de Deus. Nia mós hateten katak prosesu sei la’o hodi hetan ai-moruk barak liután, barak mak iha ona dalan-mai.
