Governu Timor-Leste

Primeiru-Ministru, Kay Rala Xanana Gusmão, akompaña husi Ministru Agrikultura, Pekuária, Peska no Floresta, Marcos da Cruz, no membrus Governu oioin, iha loron 30 fulan-juñu tinan 2024, partisipa iha serimónia ko’a hare iha postu administrativu Manatutu Vila, Munisípiu Manatutu. 

Tuir Ministériu Agrikultura, Pekuária, Peska no Floresta, iha tinan 2024 kuda ona hare ektare rihun 40 iha Timor-Leste, iha ne’ebé ektare rihun 12 lokaliza iha Manatutu. Maske ho potensiál agríkola ne’ebé boot iha rejiaun ne’e, presiza tan hadi’a infraestrutura no ekipamentu apoiu nian, hanesan sistema irrigasaun no ekipamentu agríkola modernu atu bele hasa’e produsaun ho signifikativu. 

Primeiru-Ministru apela ba agrikultór sira país tomak, liuliu ba Manatutu, atu serbisu maka’as no labele abandona sira-nia natar, hodi asegura katak Governu kompromete atu kria kondisaun sira ne’ebé presiza hodi hamenus dependénsia ba foos importadu. “Ami-nia misaun maka atu kria kondisaun no promove produsaun boot ida atu osan bele ba iha sidadaun sira hotu nia liman”, afirma Xanana Gusmão. 

Serimónia ne’e marka mós prezensa husi Bispu Dioseze Baukau, Dom Leandro Maria Alves, ne’ebé elojia inisiativa agrikultór sira nian, hodi konsidera serimónia ne’e hanesan bensan divina ida. Bispu insentiva agrikultór sira atu kontinua serbisu maka’as, ho objetivu ba auto-sufisiénsia alimentár no hamenus dependénsia ba importasaun.

Luis Inácio Henrique Fernandes, Prezidente Autoridade Munisipál Manatutu, informa katak kuaze hare ektare 1.800 maka esplora hela husi postu administrativu konsellu neen, liuliu Laleia, Laklo, Laklubar, Natarbora, Soibada no Manatutu Vila.

Serimónia ko’a hare ne’e konta ho partisipasaun husi membrus Governu, deputadus, pároku Manatutu, Padre Mário da Costa Cabral, no agrikultór lokál barak, hotu-hotu hamutuk ho objetivu komún maka atu alkansa auto-sufisiénsia alimentár no hametin ekonomia agríkola Timor-Leste.