Governu Timor-Leste

Ministru Negósius Estranjeirus no Kooperasaun, Bendito dos Santos Freitas, akompaña Prezidente Repúblika, José Ramos-Horta, no ninia delegasaun iha vizita Estadu ida ba Angola, husi loron 7 to’o 10 fulan-jullu, ho objetivu atu hametin liu tan relasaun entre país rua ne’e. 

Xefe Estadu no delegasaun to’o iha Aeroportu Internasionál Luanda iha loron 7 fulan-jullu, iha ne’ebé Ministru Negósius Estranjeirus Angola, Téte António no Embaixadór Angola nian ba Timor-Leste maka simu.

Tuir kalendáriu ofisiál, iha segunda-feira, loron 8 fulan-jullu, Prezidente José Ramos-Horta sei iha sorumutu bilaterál ida ho ninia omólogu angolanu, João Manuel Gonçalves Lourenço. Durante vizita ida-ne’e, sei asina mós protokolu kooperasaun entre Timor-Leste no Angola, no mós akordu sira seluk.

 Aleinde ne’e, husi loron 5 to’o 6 fulan-jullu, Prezidente José Ramos-Horta, ne’ebé akompaña husi Ministru Bendito Freitas no Embaixadór Timor-Leste iha Mosambike, Luís Miguel, realiza vizita Estadu ida ba Mosambike, tuir konvite ofisiál husi Prezidente Mosambike, Filipe Jacinto Nyusi.