Ministru Negósius Estranjeirus no Kooperasaun akompaña Prezidente Repúblika iha Vizita Estadu ba Mosambike
Ministru Negósius Estranjeirus no Kooperasaun, Bendito dos Santos Freitas, akompaña Prezidente Repúblika, José Ramos-Horta, iha vizita Estadu ba Mosambike, husi loron 3 to’o loron 7 fulan-jullu tinan 2024, ho objetivu atu hametin liután relasaun entre país rua ne’e. 
Iha loron 3 fulan-jullu, Prezidente Repúblika, José Ramos-Horta, no ninia komitiva to’o ba Repúblika Mosambike, no simu iha Aeroportu Internasionál Maputo husi Ministra Negósius Estranjeirus no Kooperasaun Mosambike, Verónica Macamo, no husi Embaixadór Mosambike nian ba Indonézia no Timor-Leste, Belmiro Malate. Resesaun ne’e inklui ho guarda onra hosi forsas armadas mosambikanas no aprezentasaun dansa kulturál. 
Iha loron 3 fulan-jullu ne’e mós, Ministru Bendito Freitas hala’o sorumutu bilaterál ida ho Ministra Negósius Estranjeirus no Kooperasaun Mosambike, Verónica Macamo. Durante sorumutu ne’e, sira diskute kona-ba área estratéjika kooperasaun nian, hanesan saúde, edukasaun, defeza, rekursus naturais no teknolojia. Trasa mós akordus iha área edukasaun, minerais (idrokarbonetus no minas) no polítika diplomátika. 
Iha loron 5 fulan-jullu, Ministru Negósius Estranjeirus no Kooperasaun partisipa iha sorumutu ida iha Asembleia Nasionál Mosambike, iha ne’ebé, hamutuk ho Prezidente José Ramos-Horta, diskute kestaun polítika no ekonómika ho Prezidente Asembleia nian, Esperansa Bias no deputadu sira seluk. Durante sorumutu ne’e, koalia-liu estabilidade polítika no ekonómika Timor-Leste nian iha tinan 20 ikus ne’e no diskute forma atu hametin kooperasaun parlamentár no diplomátika entre país rua ne’e.
Iha loron 5 fulan-jullu mós, Ministru Bendito Freitas akompaña Prezidente Ramos-Horta iha serimónia omenajen ba eroi no martir sira Mosambike nian iha Praça dos Heróis. 
Iha loron hanesan, Prezidente Ramos-Horta ofisialmente simu husi Prezidente Kámara Munisipál Maputo, Rassaque Manhique, no oferese ba nia xave sidade nian hanesan jestu solidariedade no fraternidade, ne’ebé simboliza ligasaun metin entre Timor-Leste no Mosambike. 
Iha loron 6 fulan-jullu, Ministru Bendito Freitas vizita Sentrál Termoelétrika Maputo nian. Vizita ne’e gia husi Prezidente Konsellu Administrasaun Empreza Públika Eletrisidade Mosambike nian, Marcelino Gildo.
Iha loron 6 fulan-jullu mós, Ministru Bendito Freitas vizita sede CAE/CPLP iha Maputu. Simu husi Diretór Koronél Armindo Alcides Garcia Sá Miranda Nogueira, Ministru salienta importánsia partisipasaun ativa Timor-Leste nian iha organizasaun, ne’ebé kria iha tinan 1996 hodi halo análize no peskiza iha área defeza no seguransa entre país membrus CPLP.
Vizita Estadu ida-ne’e hodi hametin lasu istóriku no kooperasaun entre Timor-Leste no Mosambike, no reafirma kompromisu país rua ne’e nian atu serbisu hamutuk ba dezenvolvimentu no prosperidade mútua.
