Timor-Leste nia Líder Foinsa’e sira Konklui Viajen Loron 10 ba Nasaun sira iha ASEAN
Dezenvolvimentu kapasidade rekursu umanu ne’ebé ho kualidade importante tebes ba Timor-Leste nia preparasaun atu adere ba ASEAN. Ho razaun ne’e mak Vise-Ministra Asuntu ASEAN lansa Programa Futuru Líder ba ASEAN (FLBA). Inisiativa ne’e nia objetivu mak atu estimula foinsa’e sira nia kapasidade hodi bele kolabora ho instituisaun sira iha ASEAN no kontribui ba prosesu adezaun.
Komponente krítiku ida husi programa ne’e inklui líder futuru sira halo vizita ba estadu membru sira iha ASEAN hodi haforsa relasaun no amostra Timor-Leste nia potensiál sira. Atividade ne’e, aleinde fortifika relasaun diplomátiku ne’ebé Timor-Leste iha ona ho estadu membru sira iha ASEAN, maibe hatudu mos Timor-Leste nia prontidaun hodi kontribui ba iha komunidade rejionál. 
Govenu Timor-Leste, liu husi Ministériu Negósius Estranjeirus no Kooperasaun, haruka delegasaun 8 ne’ebé kompostu husi foinsa’e nain-10 hodi ba vizita nasaun sira iha ASEAN mak hanesan Brunei Darussalam, Kambódia, Indonézia, Malázia, Filipina, Singapura, Tailándia no Vietname.
Durante vizita ba nasaun sira iha ASEAN, delegasaun sira ne’e hetan priviléjiu hodi hasoru malu ho ofisiál nível altu sira iha governu, ho suporta husi Timor-Leste nia embaixada sira. Sira mos halo interasaun ho reprezentante sira husi setór privadu, sosiedade sivíl, no akademia. Diskusaun nível altu sira ne’e fornese informasaun sira ne’ebé valiozu konaba ASEAN. Delegasaun hirak ne’e aprende diretamente husi experiénsia estadu membru ASEAN sira nian oinsá sira atinji kresimentu ekonómiku, reforsa institusionál, no prátika sira ne’ebé inovativu no sustentável.
Atividade ne’e ajuda mos foinsa’e sira hodi koñese diak liu tan konaba estadu membru sira nia prioridade no investimentu sira iha área oioin. Liu husi enkontru ne’ebé sira atende, partisipante sira estabelese parseria ne’ebé forte ho instituisaun governu sira, setór privadu no grupu akadémiku sira. Partisipante sira sei aprezenta sira nia relatóriu viajen iha semana ne’e nia laran,
Experiénsia ne’e sai hanesan oportunidade aprendizajen ne’ebé diak ba delegasaun sira no kontribui mos ba iha Timor-Leste nia preparasaun ba adezaun ASEAN. Liu husi fortalesimentu relasaun internasionál no aprende prátika diak sira husi rejiaun mak Timor-Leste pozisiona nia an ho diak atu sai membru ASEAN ne’ebé ativu no valiozu.
