Governu Timor-Leste

Ministru Justisa, Sérgio de Jesus Fernandes da Costa Hornai, prezide abertura semináriu hodi fó onra ba Loron Internasionál Apoiu ba Vítima sira Tortura nian. Eventu ida-ne’e ho tema “Tortura no Protesaun Direitus Umanus iha Timor-Leste”, organiza husi Centro Nacional Chega! I.P. kolabora ho Asosiasaun Antigus Prezus Polítikus (ASSEPOL/FPPA) no hala’o iha loron 25 fulan-juñu tinan 2024, iha Sala Konferénsia Antiga Komarka Balide, iha Dili.

 Semináriu ne’e ho objetivu atu promove loron internasionál apoiu ba vítima sira tortura nian, ne’ebé konvida públiku hodi reflete no fó omenajen ba ema sira ne’ebé sofre violénsia kruél, liuliu prizioneiru polítiku sira iha Timor-Leste no iha mundu tomak. Semináriu ne’e mós ho objetivu atu fahe memória sira kona-ba tortura sira iha pasadu ne’ebé dokumenta ona iha Relatóriu Chega! no ninia rekomendasaun sira. 

Durante ninia diskursu, Ministru Justisa ko’alia-liu nesesidade ne’ebé importante tebetebes hodi prezerva memória istórika no reafirma kompromisu Timor-Leste ho konvensaun internasionál sira kontra tortura. Governante ne’e mós subliña dezafiu sira ne’ebé hasoru husi loron pré-independénsia to’o agora, ne’ebé destaka papél fundamentál husi Centro Nacional Chega! Hanesan guardiaun memória istórika país nian. 

Semináriu ne’e mós sai nu’udar plataforma hodi diskute polítika públika no inisiativa sira ne’ebé ho objetivu atu hametin justisa no garante direitus umanus iha país ne’e. Ministériu Justisa reafirma ninia kompromisu hodi promove sosiedade ida ne’ebé justu no inkluzivu, iha ne’ebé sidadaun hotu-hotu iha asesu ba justisa no sira hetan protesaun hasoru kualkér forma tratamentu dezumanu ka degradante. 

Eventu ne’e hetan partisipasaun husi autoridade governamentál sira, reprezentante sosiedade sivíl no organizasaun naun governamentál sira, ne’ebé reafima kompromisu koletivu Timor-Leste nian hodi promove direitus umanus no harii futuru ida ne’ebé bazeia ba rekonsiliasaun no justisa.