Governu Asina Protokolu Kooperasaun ho Fakuldade Direitu Portugés
Iha loron 26 fulan-juñu, iha embaixada Timor-Leste nian iha Lizboa, Ministru Planeamentu no Investimentu Estratéjiku, Gastão Francisco de Sousa, asina protokolu kooperasaun nian lima ho fakuldade prinsipál sira Direitu nian iha Portugál.
Akordu ne’e asina ho Profesora Doutora Isabel Capeloa Gil, Reitora hosi Universidade Católica Portuguesa, Profesora Doutora Joana Aguiar e Silva, Vise-Reitora Universidade Minho, Profesór Doutór Eduardo Vera-Cruz Pinto, Diretór hosi Fakuldade Direitu Universidade Lizboa, Profesór Doutór Paulo Tarso Domingues, Diretór hosi Fakuldade Direitu Universidade Porto, Profesora Doutora Vera Lúcia Raposo no Subdiretora husi NOVA School of Law - Fakuldade Direitu hosi Universidade NOVA Lizboa.
Inisiativa ne’e promove husi Grupu Traballu atu halo Reforma ba Setór Justisa, ne’ebé koordena husi Lúcia Lobato, ho objetivu atu haruka ba Portugál, tinan-tinan, iha tinan 5 oinmai, estudante na’in-50 husi Direitu, ne’ebé iha tempu badak, sei sai hanesan reforsu importante ida ba majistraturas no Defensoria públika timorense nian.
Projetu kapasitasaun ba rekursus umanus dirije liuliu ba setór Justisa, maibé la limita de’it ba setór ida-ne’e, tanba servisu jurídiku administrasaun públika no akademia timorense nian sira sei simu parte ida hosi formandu sira ne’e. Projetu ne’e prevee katak sei iha jurista sira formadu iha Portugál ho totál na’in-250 to’o na’in-300, no sei finansia totál husi Timor-Leste, ho investimentu inisiál besik dolar amerikanu millaun 16 to’o tinan 2028.
