Ivo Valente simu pose nu’udár Vise-Ministru Justisa
Ivo Valente simu pose hosi Prezidente Repúblika, José Ramos-Horta, nu’udár Vise-Ministru Justisa iha Kuarta, loron 1 fulan Setembru tinan 2010, iha Palásiu Prezidente Nicolau Lobato, Díli.
Haree ba servisu Ministériu Justisa nian ne’ebé barak, Primeiru-Ministru IV Governu Konstitusionál, Kay Rala Xanana Gusmão, nomeia Ivo Valente nu’udár Vise-Ministru Justisa ne’ebé trata ba asuntu administrasaun iha Ministériu Justisa.
Vise-Ministru Justisa, Ivo Valente, liu hosi ninia diskursu hateten katak, “prontu atu simu responsablidade ne’ebé foun ho esperiénsia ne’ebé nia iha ho apoiu hosi sosiedade sivil no funsionáriu ministériu nian nia garante servisu hotu sei la’o ho di’ak, tanba funsaun prinsipál servisu nian mak atu fó ajuda ba Ministra Justisa”.
Ministra Justisa, Lúcia Maria Brandão Freitas Lobato, hateten “ hau sente kontente ho nomeasaun Ivo Valente hanesan Vise-Ministru hodi apoia servisu iha área justisa. Kna’ar foun ne’ebé sei asume hosi Vise- Ministu mak hare’e liubá iha área administrasaun nian”.
Ministra realsa liután katak servisu administrativu nian iha ministériu tomak Vise-Ministru mak sei halo, hanesan oinsá atu haree funsionáriu sira, asina karta ruma ne’ebé relevante ho servisu administrasaun nian, inklui mós asina kontratu ba projetu ruma hosi Departementu Aprovizionamentu, Ministériu Justisa, nian.
Iha fatin hanesan Prezidente Repúblika, José Ramos-Horta, hateten katak, “ho prezensa Ivo Valente nu’udar Vise-Ministru iha Ministériu Justisa bele reforsa liután servisu iha ministériu refere, nune’e mós bele kompleta liután servisu ne’ebé durante ne’e la konsege remata”.
