Inaugurasaun edifisiu Polísia Eskuadra Estasaun sub-distritu Ataúru
Primeiru-Ministru, Kay Rala Xanana Gusmão, hanesan mós Ministru Defesa no Seguransa, iha Sábadu, semana liubá hala’o inaugurasaun edifisiu foun Polisia Eskuadra Estasaun sub-distritu Ataúru, distritu Díli, ne’ebé halo konstrusaun ho orsamentu hosi Projetu Pakote Referendu (PPR).
Iha oportunidade ne’e, Kompañia mós entrega xave ba iha Primeiru-Ministru maibé antes ne’e sei haree dahuluk obra ne’e ho didi’ak hafoin simu xave. Tuir Sekretáriu Estadu ba Seguransa, Francisco Guterres, katak konstrusaun ne’e halo tuir obra ne’ebé hasai no kualidade, alende ne’e mós Kompañia halo aumenta tan sala tuur no sala servisu fatin nian.
Iha fatin hanesan, Diretór Kompañia ne’ebé kaer obra ne’e hateten katak, konstrusaun ne’e la’o tuir obra ne’ebé simu hosi edifisiu Sekretaria Estadu Seguransa, maibé hanesan timór-oan kontribui mós ba iha dezenvolvimentu hodi aumenta sala atu nune’e membru Polísia Eskuadra sub-distritu Ataúru bele hala’o servisu ho di’ak no atende komunidade.
