Governu Timor-Leste

Ministru Planeamentu no Investimentu Estratéjiku, Gastão Francisco de Sousa, partisipa iha Forum Internasionál ba da-15 kona-ba Investimentu no Konstrusaun Infraestruturas (IIICF), ne’ebé hala’o iha loron 19 to’o 21 fulan-juñu, iha Cotai Expo, Venetian Makau. 

 Iha Forum ne’e, Ministru Gastão de Sousa hola parte iha sesaun ida kona-ba dezenvolvimentu verde no projetu infraestrutura sustentavel iha país sira ne’ebé ko’alia lian portugés (PLP, sigla iha lian portugés), ne’ebé diskute oportunidade kooperasaun, kooperasaun finanseira, vantajen no esperiénsia empreza xineza sira nian no perspetiva kooperasaun iha futuru. 

Iha ninia intervensaun, Governante ne’e ko ’alia-liu importánsia estratéjika infraestruturas ba dezenvolvimentu sustentavel Timor-Leste nian, no afirma katak país ne’e iha “momentu ida ne’ebé importante tebes ba ninia jornada dezenvolvimentu”. Nia mós hateten katak “ami-nia Planu Estratéjiku Dezenvolvimentu (PED) 2011-2030 deskreve ami-nia roteiru hodi transforma Timor-Leste sai país ida ne’ebé ho rendimentu médiu-aas to’o tinan 2030”, ho foka liu ba “kapitál sosiál, dezenvolvimentu ekonómiku no dezenvolvimentu infraestrutura hanesan katalizadór ba kreximentu”. 

Ministru subliña katak prioridade nasionál prinsipál inklui hadi’a rede transporte, dezenvolve solusaun enerjia sustentavel, loke tan asesu bee moos no saneamentu, halo investimentu iha infraestrutura dijitál no promove dezenvolvimentu urbanu no rurál ne’ebé ekilibradu. Nia hateten mós katak “infraestrutura moderna, efisiente no reziliente importante tebes atu loke ita-nia potensiál tomak”, ho forma atu “fasilita komérsiu, atrai investimentu no hadi’a kualidade moris ita-nia povu nian”. 

Gastão de Sousa afirma katak “dalan ba dezenvolvimentu sustentavel maka hahú ho kolaborasaun, inovasaun no investimentu estratéjiku” no manifesta interese nasionál “hodi esplora oportunidade ba parseria públiku-privada (PPP), empreendimentu hamutuk no troka koñesimentu hodi avansa iha ajenda infraestrutura ne’ebé iha sustentabilidade no reziliénsia”.

Organiza hamutuk husi Asosiasaun Konstrutores Sivis Internasionais Xina (CHINCA) no husi Institutu Promosaun Komérsiu no Investimentu Makau (IPIM), Forum Internasionál ba da-15 kona-ba Investimentu no Konstrusaun Infraestruturas (IIICF) ne’ebé halibur reprezentante indústria liu rihun tolu husi país no rejiaun liu 70.