Governu Timor-Leste

Ministériu Administrasaun Estatál no Ordenamentu Territóriu (MAEOT) fasilita  konférensia Sidade Amiga sira, Austrália – Timor-Leste iha sub-distritu Maubisse hosi loron 27-28 fulan Agostu. Tema ba sorumutu ne’e mak “Haforsa Relasaun Amizade hosi Povu ba Povu”.

Ministru Arcângelo Leite ne’ebé hala’o abertura ba konférensia ne’e hateten “Konferensia ne’e hanesan kontinuasaun ba konférensia ne’ebé hala’o iha 2003, ne’ebé Governu lokál Sidade Melbourne, Victoria mak organiza. Iha altura ne’ebá hili hanesan tema mak “Servisu Hamutuk ba Timor-Leste” no eventu ne’e sai nu’udar embriaun ba konférensia Sidades Amigas entre Australia no Timor-Leste ne’ebé  hala’o ona ba dala rua iha Timor-Leste, 2008 no 2010.

Governante ne’e realsa tan katak, agora daudaun sidade munisipiu  barak ona iha Australia mak iha relasaun amizade ho sidade sira iha Timor-Leste liu-iu iha distritu no sub-distritu. Hau hein katak inisiativa ida-ne’e atu povu rai rua nian tulun malu, oportunidade di’ak ba ita aprende tan kona-ba oinsá ita bele hamrik mesak no hadook ita hosi kultura dependénsia.

Sorumutu ne’e remata ho rezolusaun balu hanesan, konférensia iha futuru sei hala’o tinan lima-lima, loke web side ida hodi fasilita komunikasaun no servisu hamutuk ho ministériu sira relevante atu fasilita membru sira hetan vistu no izensaun impostu.

Konférensia ne’e hetan mós intervensaun  hosi Presidente Republika, José Ramos-Horta, no Peter Heyward, Embaixadór Austrália ba Timor-Leste. Partisipante sira inklui Administradór distritu, sub-distritu, reprezentante sidade amiga sira hosi Austrália no reprezentante sidade amiga sira hosi Timor-Leste.