MNE Singapura vizita ofisiál ba Timor-Leste
Ministru Negósius Estranjeirus Singapura hala’o vizita ofisiál ba Timor-Leste, ne’ebé hahú iha loron 17 to’o 22 fulan Agostu. Vizita ida-ne’e hanesan vizita ofisiál ba dahuluk mak membru governu ida hosi Singapura halo ba Timor-Leste.
Ministru Negósius Estrangeirus, Zacarias Albano da Costa, hateten katak: “Objetivu vizita ofisiál hosi Ministru George Yeo ba Timor-Leste importante atu hametin liután ita nia relasaunsira diplomátika, ekonómika no ita nia koperasaun bilaterál”.
Bainhira iha Timor-Leste, Ministru George Yong-Boon Yeo, hasoru ho’o Prezidente Ramos-Horta no halo mós vizita kortezia ba Prezidente Parlamentu Nasionál, Fernando "Lasama" de Araújo, Vise-Primeiru-Ministru, José Luís Guterres, ne’ebé momentu ne’e ka’er kna’ar hanesan Primeiru-Ministru Interinu.
Iha quarta-feira kalan, Ministru George Yeo hó nia delegasaun partisipa iha enkontru bilaterál iha Ministériu Negósius Estranjeirus.
Iha konferénsia imprensa ne’ebé, tuir enkontru ne’e Zacarias Albano da Costa, realsa katak “ami partisipa hamutuk Iha enkontru sira barak ne’ebé ami diskute kestaun sira bilaterál, regionál no internasionál. Iha enkontru hirak ne’e ami koalia mós kona-ba pontu sira hó relasaun ba ita nian esforsu atu dezenvolve Timor-Leste nia ekonomia; ami koalia mós aspektu sira iha ita nian koperasaun ne’ebé sai kada vez forte liután. Ami mós troka pontu devizta kona-ba halo nusá mak Timor-Leste bele prepara an atu sai membru ASEAN nian” .
Ministru Negósius Estrangeirus Singapura nian, George Yong-Boong Yeo, bainhira refere área koperasaun realsa katak: “Singapura apoia ba Timor-Leste mak númeru 1 iha Singapura nia lista prioridade atu fó apoiu. Singapura hakarak Timor-Leste ba oin nomós hakarak Timor-Leste hetan susesu iha nia dezenvolvimentu iha área sira hotu, hodi bele hatudu ba pais sira ki’ik ne’ebé hasoru difikuldade, katak sira mós bele hetan susesu ”.
