Delegasaun Vatikanu vizita Dili hodi avalia preparasaun ba vizita Papa Francisco nian
Hosi loron 1 to’o 5 fulan-juñu tinan 2024, Timor-Leste simu vizita husi ekipa Vatikanu nian ida hodi avalia preparativus ne’ebé la’o hela ba vizita Sua Santidade Papa Francisco nian mai Timor-Leste. Vizita Apostólika ida-ne’e, sei hala’o husi loron 9 to’o 11 fulan-setembru tinan 2024, ho esperansa boot tebetebes hodi hein no hanesan momentu istóriku ida ba ita-nia país. 
Durante vizita ne’e, ekipa Santa Sé hala’o sorumutu ho ekipa governamentál nasionál no vizita fatin sira ne’ebé Santu Padre atu marka prezensa bá, hodi haree no apresia ho avansu no kualidade preparativus ne’ebé atinje ona entre porsentu 60 to’o 70.
Molok vizita papál iha fulan-setembru, ekipa sira husi Vatikanu sei fila-mai Timor-Leste iha fulan-jullu no fulan-agostu atu kontinua halo avaliasaun ba preparasaun vizita papál ne’e. 
Lema ne’ebé hili ba Vizita Papál ne’e, “Atu imi-nia fiar sai imi-nia kultura”, ne’e hanesan “konsellu no enkorajamentu atu moris iha fiar ida ne’ebé armonia ho kultura, tuir tradisaun povu timoroan nian”.
Iha fulan-abril liubá, hafoin anúnsiu ofisiál ba vizita ne’e, Reprezentante Governu, Vise-Koordenadór-Jerál Altu Nivel Institusionál ba vizita papál, Ministru Tomás do Rosário Cabral, afirma katak, “ho esperansa no entuziazmu boot ita hein Papa Francisco nia xegada” no fiar “katak Vizita Apostólika ida-ne’e sai momentu bénsaun no renovasaun espirituál ida ba timoroan sira hotu, ne’ebé fó inspirasaun mai ita ida-idak hodi kontinua harii sosiedade ida bazeia ba valór pás, solidariedade no fraternidade”. 
