Governu Timor-Leste

Iha loron 10 fulan-maiu tinan 2024, Timor-Leste partisipa iha sorumutu Konsulta Funsionáriu Boot ASEAN-Xina nian ba da-30, ne’ebé realiza iha Sekretariadu ASEAN iha Jakarta. 

Durante sorumutu, sira analiza dezenvolvimentu iha relasaun entre ASEAN no Xina, ho diskusaun kona-ba diresaun Parseria Estratéjika Abranjente ASEAN-Xina nian iha futuru, nune’e mós kestaun rejionál no internasionál.

Nu’udar país observadór ba organizasaun ne’e, Timor-Leste hetan oportunidade atu halo observasaun balun no hato’o ninia apresiasaun ba avansu iha kooperasaun entre ASEAN no Xina, iha área oin-oin no inisiativa ne’ebé diskute ona. Delegasaun nasionál subliña mós valór ne’ebé Timor-Leste atribui ba forma hotu-hotu kooperasaun nian iha pilár tolu ASEAN no área sira ne’ebé iha relasaun, nune’e mós hato’o dezeju atu kontribui no partisipa iha esforsu no inisiativa kooperasaun nian iha futuru. 

Sorumutu ne’e prezide hamutuk husi Khin Thidar Aye, Diretora-Jerál Ministériu Negósius Estranjeirus Mianmar, no Sun Weidong, Vise-Ministru Negósius Estranjeirus Repúblika Populár Xina nian. Sura mós ho prezensa husi lider oioin Sorumutu Funsionáriu Boot (SOM) ASEAN nian, membru Sekretariadu ASEAN, no Timor-Leste hanesan observadór. Elisa da Silva, Diretora-Jerál ba Asuntus ASEAN maka lidera delegasaun Timor-Leste, ne’ebé akompaña husi Konselleiru Crisogno de Araújo no Ajente Ligasaun ba ASEAN, Ivan Alves.