Governu Timor-Leste

Vise-Ministra ba Asuntus ASEAN, Milena Rangel, hetan akompañamentu husi reprezentante sira programa “Futuru Lider Ba ASEAN” (FLBA) nian, simu husi Presidente Repúblika, José Ramos-Horta, iha Palásiu Prezidensiál Nicolau Lobato, iha loron 13 fulan-maiu tinan 2024. 

Durante enkontru, Vice-Ministra aprezenta programa FLBA, hanesan inisiativa ida husi Governu Timor-Leste, liuhusi Ministériu Negosius Estranjeirus no Kooperasaun, ho objetivu atu prepara futuru lider sira hodi hasoru dezafiu sira integrasaun rejionál nian iha ASEAN. 

Prezidente José Ramos-Horta elojia esforsu sira Governu nian iha ezekusaun ba roteiru adezaun ASEAN nian no fahe mós liafuan balu atu insentiva no inspira joven partisipante sira iha programa ida-ne’e. 

Iha fulan ida-ne’e, partisipante sira husi programa FLBA, sei hahú viajen hodi hakle’an koñesimentu kona-ba nasaun sira ASEAN nian, nu’udar parte ida husi esforsu Governu nian atu hametin relasaun ho rejiaun no prepara lider jerasaun foun ida ne’ebé kapasitadu.