Governu Timor-Leste

Primeiru-Ministru Xanana Gusmão nomeia tiha ona Agio Pereira, Ministru Prezidénsia Konsellu Ministrus, hanesan interlokutór iha diskusoens ho Steve Bracks AC nu’udar Reprezentante Espesiál Austrália nian kona-ba dezenvolvimentu Greater Sunrise.

Dezenvolvimentu Greater Sunrise hanesan prioridade estratéjika ida ba Timor-Leste atubele harii bazes ne’ebé metin ba ekonomia ida ne’ebé sustentável no fó benefísius ho oportunidades sosiais ba povu timor tomak. Francisco da Costa Monteiro, Ministru Petróleo no Rekursus Minerais, mak lidera hela traballu ne’e liuhusi kooperasaun ho ninia omóloga Australiana, Madeleine King, Ministra Rekursus, tuir kuadru regulamentár ne’ebé estabelese iha Tratadu kona-ba Fronteira Marítima entre Timor-Leste ho Austrália.

Ministru Pereira sei hala’o knaar hanesan interlokutór hodi halo diskusoens regulares ho Steve Bracks no sai hanesan kanál (ka mata-dalan) ba lideransa timornian iha Greater Sunrise.  Hili duni Ministru Pereira atu hala’o knaar ne’e tanba nia papél hanesan Ajente Timor-Leste nian iha prosesu Konsiliasaun Obrigatória husi Nasoens Unidas ne’ebé hamosu Tratadu Fronteira Marítima, no mós nia kompreensaun ne’ebé kle’an tebes kona-ba Sistema polítiku Austrália nian.  Nu’udar interlokutór, Ministru Pereira sei tulun fasilita komunikasaun, hato’o informasoens no harii entendimentu ne’ebé di’ak entre governu rua.

Governu Timor-Leste sente laran haksolok ho progresu hirak-ne’ebé halo daudaun ona iha dezenvolvimentu Greater Sunrise no ho nomeasaun interlokutór ida ne’ebé sei dezempeña papél  di’ak iha fasilitasaun projetu kritíku ne’e.