Santa Sé anunsia logotipu no lema ofisiál Vizita Papa Francisco iha Timor-Leste
Ohin loron 8 fulan-maiu tinan 2024, Santa Sé anunsia logotipu no lema ofisial hosi Vizita Apostólika Santu Padre, Papa Francisco, mai ita-nia país.
Iha publikasaun, ida ne’e Santa Sé esplika katak “logotipu ida ne’e tau imajen papa Francisco fó bensa hela iha klaran, hodi simboliza protesaun ne’ebé povu timoroan simu husi Maromak durante Viajen Apostólika Santu Padre nian”. Iha imajen kotuk papa Francisco nian, “iha globu mundu nian, ho mapa jeografia Timor-Leste nian iha oin”. 
Lema ne’ebé hili ba Vizita Papal “Atu imi-nia fiar sai imi-nia kultura”, ne’e nu’udar ezortasaun no enkorajamentu atu moris iha fiar ida ne’ebé armonia ho kultura, tuir tradisaun sira povu timoroan nian.
Ita hein ho espetativa boot, Vizita Apostólika Sua Santidade Papa Francisco nian, hosi loron 9 to’o loron 11 fulan-setembru tinan 2024, nu’udar momentu istóriku ida ba ita-nia nasaun.
Komisaun Organizadora Governamentál ba vizita Sua Santidade Papa nian mai Timor–Leste kontinua serbisu makas iha preparasaun no organizasaun ba eventu ida-ne’e atu garante ninia susesu.
