Governu Timor-Leste

Primeiru-Ministru, Kay Rala Xanana Gusmão, ne’ebé akompaña husi Ministru Administrasaun Estatál, Tomás do Rosário Cabral, prezide serimónia lansamentu Balkaun Úniku dahuluk país nian, iha munisípiu Manatutu, iha loron 4 fulan-maiu tinan 2024, hanesan pasu signifikativu ida ba desentralizasaun. 

Balkaun Úniku ne’e hanesan rezultadu husi parseria ida entre Ministériu Administrasaun Estatál no Programa Nasoins Unidas ba Dezenvolvimentu (PNUD), ne’ebé hanesan inovasaun importante ida Governu nian hodi hakbesik servisus públikus ba sidadaun sira. Ministériu Justisa mós hanesan parseiru importante ida iha esforsu ida-ne’e, tanba iha faze dahuluk, sidadaun sira bele hetan asesu ba servisus Diresaun-Jerál Rejistus no Notariadu, hanesan Billete Identidade, Rejistu Kriminál no Emisaun Pasaporte. 

Servisu sira ne’ebé disponivel iha edifísiu ida-ne’e la’ós de’it sei simplifika asesu sidadaun sira nian ba servisu governamentál sira ne’ebé esensiál, maibé mós sei promove transparénsia, hamenus kustu, kombate korrupsaun no sai fonte asesu ba informasaun públika ida ne’ebé konfiavel, nune’e bele hametin relasaun entre Governu no sidadaun sira. 

 Lansamentu Balkaun Úniku iha Manatutu marka pasu dahuluk husi pasu hotu-hotu ba desentralizasaun ida ne’ebé luan liu, ho objetivu atu halo servisu sira governu nian bele asesu ba timoroan sira hotu, inklui sira ne’ebé hela iha áreas remotas. Ho esforsu dijitalizasaun ne’ebé kontínuu, hein katak servisu sira ne’ebé Balkaun Úniku oferese bele nakloke no bele atende ba nesesidade populasaun tomak.

Balkaun Úniku ne’e la’ós de’it inovasaun simples ida, ida ne’e hanesan kompromisu ida ba demokrasia, transparénsia no efisiénsia, ne’ebé ho objetivu atu promove moris-di’ak no dezenvolvimentu Timor-Leste nian.

 Serimónia lansamentu ne’e partisipa husi membru Governu oin-oin, membrus Parlamentu Nasionál, reprezentante sira hosi instituisaun públika no estatál, autoridade lokál, parseiru dezenvolvimentu no korpu diplomátiku sira.