Governu Timor-Leste

Atu hanoin hikas loron konsulta popular iha tinan 1999 ne’ebé Povu Timor hakarak hili dalan ukun rasik aan, Governu liu husi Ministériu Administrasaun no Ordenamentu Teritóriu hala’o atividade hanesan Marxa Amigável ne’ebé hahu hosi Palasio Prezidenti Aitarak-klaran no ikus iha Kampu Demokrasia ne’ebé anima husi Drum Band Colegio São Minguel. Alende ne’e, mós iha atividade  sira seluk hanesan sa’e buah,  dada Lotre no konsertu múzika ne’ebé hala’o husi grupu múzika timor-oan sira nian no atividade  sira ne’e hala’o iha Kampu Demokrasia Díli iha segunda-feira (30/08).

Ministru Administrasaun Estatál no Ordenamentu Teritóriu, Arcângelo Leite, informa katak, “Parabéns ba Povu Timor-Leste tamba ohin loron bele komemora Aniversáriu konsulta popular ba dala-sanulu resin ida” nia mós hatutan “Governu  komesa hosi tinan ida ne’e ba oin atu komemora loron Aniversáriu Konsulta Popular sei la hala’o Seremonia Formal hanesan Parada-Militar hasa’e no hatún Bandeira no seluk tan maibése hala’o deit aktividade Non-Formal hanesan, atividade desportiva, kulturál no sei halo konsertu múzika atu bele kapasita ita nia artista timor oan sira.

Iha fatin hanesan Prezidente Repúblika, DR. José Ramos Horta, mós hateten katak: “ohin loron ne’e serimónia ida ne’ebé boot teb-tebes, nune’e husu ba Joven sira atu estuda no se la estuda tinan sanulu ba oin ita hateke no hanoin fila fali ba kotuk katak, uluk hau estuda karik, oras ne’e bele remata ona Mestradu” nune’e Prezidente husu atu “estuda maka’as atu aban bain rua bele sai boot atu nune’e Familia, Aldeia, Suku no Nasaun tomak bele iha orgullu ba imi”.

Partisipa Iha Komemorasaun konsulta popular  liu husi Marxa Amigável ne’e, maka Prezidente Repúblika, DR. Jose Ramos Horta, Ministru Arcângelo Leite, Reprezentante UNMIT, Fien Riesken Nelsen, Sekretáriu Estadu ba Reforma Administrativa, Florindo Pereira, Sekretária Estadu ba Igualdade, Idelta Maria Rodriques, Sekretáriu Estadu ba Obras Públika, Domingos Caeiro, no Brigadeiru-Jenerál F-FDTL Lere Anan Timur no seluk-tan.