Governu Timor-Leste

Primeiru-Ministru, Kay Rala Xanana Gusmão, hala’o enkontru bilaterál oioin durante Konferénsia “Ita-nia Oseanu”, ne’ebé hala’o iha Atenas, Grésia, hosi loron 15 to’o 17 fulan-abríl tinan 2024. Entre ne’ebé interesante maka diálogu ho perita iha Biolojia Mariña no Oseanográfika Amerikana, Sylvia Earle, no membrus Governu Vanuatu, Dominika, São Tomé e Príncipe no Namíbia nian.

Durante sorumutuk ho Sylvia Earle, Primeiru-Ministru hato’o konvite atu halo vizita ida mai Timor-Leste, ho objetivu partilla esperiénsia kona-ba diversidade tasi nian. Sylvia Earle hato’o ninia laran-ksolok hodi hasoru malu ho Primeiru-Ministru no diskute dalan oinsá atu prezerva no tau-matan ambiente tasi, objetivu ida ne’ebé parte rua-ne’e iha kompromisu ida ne’ebé kle’an. 

Estadu Vanuatu, liuhosi Ministru Alterasoins Klimátikas, Ralph Regenvanu, hato’o ninia vontade hodi estabelese kooperasaun bilaterál ho Timor-Leste, liuliu iha kestaun sira ne’ebé relasiona ho alterasaun klimátika no prezervasaun rekursus marítimus. Primeiru-Ministru Xanana Gusmão promete sei koordena esforsus ho Ministériu Negósius Estranjeirus no Kooperasaun hodi hametin lasu diplomátiku entre nasaun rua ne’e. 

Kona-ba enkontru ho Primeiru-Ministru Dominika, Roosevelt Skerrit, lider rua-ne’e diskute formas kooperasaun bilaterál iha área polítika, ekonómika no asuntu sira seluk ne’ebé sai interese hamutuk.

Hala’o enkontru mós ho Patrice Émery Trovoada, Primeiru-Ministru São Tomé e Príncipe no Derek Klazen, Ministru Peskas no Rekursus Mariñus Namíbia nian. 

Konferénsia “Ita-nia Oseanu”, ho tema “Oseanu ida ne’ebé Potensiál”, halibur lider mundiál sira, reprezentantes hosi organizasaun rejionál no internasionál sira, nune’e mós setór privadu no organizasaun naun governamentál sira. Ninia objetivu mak atu diskute promosaun ba kompromisu konkretu iha área sira hanesan zona mariña protejida, ekonomia azúl sustentavel, kombate ba alterasaun klimátika, peska sustentavel no redusaun ba poluisaun tasi.