Governu Timor-Leste

Timor-Leste sei reprezenta iha sorumutuk Grupu Espesialistas Paízes Menus Dezenvolvidus kona-ba implementasaun Planus Nasionais Adaptasaun (NAPs, Akrónimu iha lian inglés) nian, iha NAP Expo 2024, ne’ebé realiza husi loron 22 to’o 25 fulan-abríl tinan 2024, iha Dhaka, Bangladesh. Delegasaun timoroan ne’ebé lidera husi Enviadu Espesiál no Embaixadór Timor-Leste ba Asuntus Klimátikus, Adão Soares Barbosa, ne’ebé akompaña husi Konselleiru Ministériu Negósius Estranjeirus no Kooperasaun nian, Licínio Branco. 

NAP Expo, ne’ebé organiza husi Grupu Espesialistas Paízes Menus Dezenvolvidus (LEG) ne’ebé kolabora ho Konvensaun-Kuadru Nasoins Unidas kona-ba Mudansa Klima nian (UNFCCC, sigla iha lian inglés) no entidade sira seluk, ho objetivu atu promove partilla esperiénsia no parseria hodi hasa’e formulasaun no implementasaun Planus Nasionais Adaptasaun (NAPs) nian. Eventu ne’e halibur interveniente lubun ida no parte interesada sira, ne’ebé inklui governu, organizasaun internasionál, instituisaun finanseira sira no setór privadu hodi diskute orientasaun téknika sira, prátika di’ak-liu no asesu ba finansiamentu, atu fortalese adaptasaun ba alterasaun klimátika iha mundu tomak. 

NAP Expo 2024 sei konta ho abertura ofisiál husi Sheikh Hasina, Primeira-Ministra Bangladesh nian, no sei konta ho prezensa husi Estadus Membrus Paízes Menus Dezenvolvidus, Estadus Membrus ne’ebé iha hela Dezenvolvimentu, Ajénsia sira husi Nasoins Unidas, Organizasaun Naun Governamentál Nasionál no Internasionál, Instituisaun Finanseira sira hanesan Banku Mundiál, Fundu Verde ba Klima, Fundu Adaptasaun, Fundu ba Ambiente Globál no membrus Governu Bangladesh nian.