Timor-Leste partisipa iha Diálogu ASEAN-Nova Zelândia
Governu Timor-Leste reafirma ninia kompromisu makaas ho Parseria Estratéjika ASEAN-Nova Zelándia durante ninia partisipasaun iha Diálogu ASEAN no Nova Zelándia ba da-31, ne’ebé realiza iha loron 18 no 19 fulan-abríl tinan 2024, iha Wellington. Delegasaun timoroan ne’ebé lidera husi Diretora-Jerál ba Asuntus ASEAN husi Ministériu Negósius Estranjeirus no Kooperasaun, Elisa da Silva, marka prezensa iha eventu ne’e nu’udar país-observadór. 
Durante diálogu ne’e ko’alia kona-ba kestaun oioin, husikedas pás no seguransa to’o kooperasaun komersiál no ekonomia, inklui edukasaun, ekonomia verde no dijitál, nune’e mós ba protesaun ambientál no dezenvolvimentu sustentável no inkluzivu.
Iha ninia deklarasaun jerál, Timor-Leste hato’o ninia kompromisu makaas atu kontinua implementa Planu Asaun no espresa ninia apresiasaun sinsera ba Estadu-Membru sira hotu ASEAN nian, Sekretariadu ASEAN no Governu Nova Zelándia kona-ba apoiu ne’ebé laiha rohan ba adezaun Timor-Leste nian ba ASEAN.
Sorumutuk ne’e mós sai sasin ba rekoñesimentu mútuu ba kompromisu entre ASEAN no Nova Zelándia hodi fó enerjia ba parseria estratéjika, hodi esplora área kooperasaun foun hanesan seguransa sibernétika, komérsiu, investimentu no ekonomia dijitál, nomos tema sira seluk ne’ebé sai interese komún.
Parte rua-ne’e konkorda malu atu hametin implementasaun efikás ba Área Livre Komérsiu ASEAN–Austrália-Nova Zelándia no Akordu Parseria Ekonómika Abranjente Rejionál nian, iha tempu hanesan hein ho esperansa atividade konkreta sira hodi hakle’an kooperasaun prátika, liuliu iha ámbitu Perspetiva ASEAN nian kona-ba Indo-Pasífiku (AOIP, sigla iha lian inglés).
Konsidera katak tinan 2025 nu’udar Aniversáriu Relasoins Diálogu ASEAN-Nova Zelándia nian ba da-50, parte rua-ne’e konkorda malu hodi esplora inisiativa no atividade sira atu komemora momentu istóriku ida-ne’e no hakle’an liu tan kooperasaun ne’e. Nova Zelándia manifesta mós ninia intensaun atu solisita estabelesimentu Parseria Estratéjika Abranjente ida ho ASEAN hamutuk ho aniversáriu relasoins nian ba da-50 ne’e.
