Governu Timor-Leste

Primeiru-Ministru kontinua hala’o programa konsulta Planu Estratéjiku Dezenvolvimentu Nasionál (PEDN) ba daruak iha sub-distritu Nítibe, distritu Oe-Kuse, loron 15, fulan Agostu.

Molok atu tama ba konsulta PEDN, uluk nanain Administradór sub-distritu hato’o preokupasaun no kondisaun jeográfika sub-distritu Nitibe katak, sub-distritu Nítibe iha problema hanesan estrada, eletrisidade, bee-mos no Edukasaun sai hanesan problema bazika sira-ne’ebé akontese iha sub-distritu ne’e, tanba ne’e husu ba Governu atu bele tau atensaun ba problema hirak ne’e. Preokupasaun hanesan mós hato’o hosi Xefe Suku sira katak husu ba Governu atu hadi’a estrada hosi Oe-Kuse atu nune’e povu bele asesu estrada.

Hatán kona-ba problema hirak ne’e, Sekretáriu Estadu Obras Publikas, Domingos Caeiro, hateten katak iha tinan ida-ne’e iha ona orsamentu atu  hadi’a estrada hosi Pante Makasar atu bele ba to’o iha Nítibe, maibé atu hadi’a la’os tinan ida de’it, maibé persiza tinan barak atu nune’e povu bele lori nia produtu lokál ba iha merkadu. Kona-ba ponte Governu iha tinan ne’e iha ona osan atu halo ponte Tono hosi Noe-Fefan se iha mota rua no ki’ik rua Planu 2011 ita sei hare nafatin Tono la’os halo de’it iha tinan ida, maibé persiza tinan rua ka tolu hodi finaliza.

Iha fatin hanesan Sekretáriu Estadu Eletrisidade Água no Urbanizasaun, Januário Pereira, katak Governu ida-ne’e hahú nia tomada de pose, hahú nia polítika oinsá bele optimiza sentrál elétrika no harii sentrál sira foun iha rai ketan Oe-Kuse iha postu Nítibe ho 50 kw  hodi fahe ba suku lima. Kona-ba bee-mos katak sira nia funsionáriu sei sukat bee, kuandu bee matan laiha ita sei fura bee iha rai-ókos, se karik mós laiha, bele uza teknolojia modernu foun atu bele tais  tasi-been hodi sai fali bee-mos, maibé implementasaun ne’e sei la’o neneik.