Governu Timor-Leste

Primeiru-Ministru, Kay Rala Xanana Gusmão, hamutuk ho embaixadór Xina iha Timor-Leste, Su Jian, hala’o lansamentu fatuk dahuluk ba konstrusaun edifísiu Ministériu Defeza no Seguransa no Kuartél Jenerál F-FDTL, iha loron 24, iha Fatuhada, Díli.

Xanana Gusmão hateten “Ho ksolok bo’ot hau mai iha serimónia ida ke ita hein kleur ona. Ita labele ejiji ba institusaun Estadu nian sira atu kumpri sira nia obrigasaun tomak ho empeñu no profisionalizmu, se primeiru ita la fó ba sira kondisaun servisu ne’ebé diak no tuir sira nia presiza”.

Bainhira ita lansa fatuk dahuluk ba konstrusaun edifísiu ne’ebé sei hamahon Ministériu Defeza no Seguransa no Kuartél-Jenerál F-FDTL nian, la signifika katak Governu halo favór ruma ba instituisaun militár, maibé kumpri dadaun devér ida ne’ebé Governu labele ses-an, hatutan Primeiru-Ministru.

Iha fatin hanesan Embaixadór Xina, Su Jian, hateten katak “konstrusaun edifísiu Ministériu Defeza no Seguransa no Kuartél-Jenerál F-FDTL nu’udar oferta ida hosi Xina ba F-FDTL atu iha futuru bele halo servisu di’ak liután”.

Nune’e mós Sekretáriu Estadu Defeza, Júlio Tomás Pinto, informa katak “Orsamentu ba konstrusaun ne’e hamutuk dolár amerika millaun 8ne’ebé oferese hosi Governu Xina. Hosi Governu Timor-Leste gasta de’it dolár amerika rihun atus tolu hodi ateru rai, hatama bee no eletrisidade.” Aleinde ne’e Júlio Tomás Pinto realsa liután, konstrusaun ne’e sei hahú iha fulan oin (Outubru) no sei remata iha tinan oin (durante fulan 15).