Ministru Ekonomia no Dezenvolvimentu hi’it-an ba Sydney
Ministru Ekonomia no Dezenvolvimentu, João Mendes Gonçalves hit-an ba Sydney hodi partisipa hanesan oradór iha konferénsia Pacific Island Investment Summit, ne’ebé mak hala’o iha loron 12 no 13 fulan Agostu, iha Dockside Conference Centre, iha Darlin Harbour Sydney, ne’ebé organiza hosi Business Advantage International no husi Pacific Island Trade & Invest.
Personalidade internasional oioin mak partisipa iha ne’ebá, hanesan, reprezentante hirak hosi Banku ANZ, hosi European Invesment Bank, hosi Asian Development Bank, hosi International Finance Corporation, hamutuk ho sira seluk tan. Ministru Ekonomia koalia minutu 30 kona-ba realidade sosio-ekonomia iha Timor-Leste, hodi bolu mós atensaun ba dezafiu hirak paíz ne’e enfrenta iha nível atu hetan investimentu foun, iha área hirak agrikultura, peska, turizmu, hamutuk ho buat seluk tan hodi koalia liután kona-ba importante atu harii pipeline iha Tasi Mane, hanesan veíkulu ida esensiál ba dezenvolve paíz ne’e.
Aproveita ninia deslokasaun ba Austrália, atu la’os de’it halibur hamutuk ho investór oioin, maibé mós ho Eis-líder Partidu Liberal Kerry Chikaorvki, nomós ho Tony Williams, prezidente Australia Timor-Leste Business Council nian, Ministru ne’e mós hato’o entrevista ida ba iha ABC – Australia Broadcasting Corporation, Rádiu Australia, no koalia tan, iha Tersa-feira, loron 10 fulan Agostu palestra ida ne’ebé ho títulu “Adeus konflitu bem-vindu dezenvolvimentu” iha Australian Institute of International Affairs, ba plateia ida hosi ema reprezentante hosi empreza no investór oioin, Organizasaun hirak la’os Governu nian, Universidade sira no Sosiedade Sivil. La’os de’it koalia kona-ba oportunidade hirak ba investimentu nian iha Timor-Leste, Ministru mós temi liafuan ruma kona-ba atu harii pipeline iha Timor-Leste hanesan oportunidade ida úniku ba dezenvolve paíz ne’e no atu haki’ak empregu ba prazu badak no naruk hodi simu populasaun lokál.
