Xefe Estadu no Governu partisipa iha semináriu nasionál iha ámbitu komemorasaun aniversáriu Masakre Likisá ba da-25
Primeiru-Ministru, Kay Rala Xanana Gusmão no Prezidente Repúblika, José Ramos-Horta, partisipa iha semináriu nasionál hodi komemora aniversáriu Masakre Likisá ba da-25. Eventu ne’e ho títulu “Selebra Vitória no Luta Ba Justisa, Ita La’ós Vítima, Maibé Ita Mak Autór Istóriku”, ne’ebé realiza iha loron 5 fulan-abríl tinan 2024, iha Tokodede, Likisá. 
Masakre Likisá, akontese iha fulan-abríl tinan 1999, fulan lima molok referendu ne’ebé lori Timor-Leste ba ukun-rasik an. Ema besik rihun rua refujia iha igreja lokál, hafoin soldadu no milísia sira pró-indonézia nian sunu no estraga uma iha munisípiu ida-ne’e. Igreja maka alvu atake husi milísia sira no ema entre 30 to’o 100 maka mate. Masakre Likisá maka atake dahuluk iha ne’ebé milísia sira invade igreja ida, fatin ne’ebé konsidera seguru iha momentu ne’ebá.
Iha eventu refere, Prezidente José Ramos-Horta foka-liu importánsia husi prosesu rekonsiliasaun nasionál no papél Komisaun Verdade no Amizade nian, no afirma katak Estadu nia devér atu rekoñese partisipasaun sidadaun sira hotu iha luta ba ukun-rasik an, husikedas vítima masakre to’o veteranu no ferik-katuas sira, hanesan asua’in moris, no garante direitu ne’ebé merese sira hetan tanba sira-nia kontribuisaun. 
Primeiru-Ministru, Kay Rala Xanana Gusmão, reforsa kompromisu Governu atu rezolve kestaun veteranu sira nian, kuida ninia asua’in moris sira, liuliu sira ne’ebé sei moris iha difikuldade nia laran, hodi garante ba sira-nia direitu no justisa. Xefe Governu mós destaka presiza rekoñesimentu no apoiu kontínuu ba família afetada sira, nune’e mós kompromisu atu prezerva memória istórika masakre ne’e nian. 
Prezidente Autoridade Munisipál Likisá, Paulino Ribeiro, agradese ba prezensa no apoiu Prezidente Ramos-Horta no Primeiru-Ministru Xanana Gusmão nian, ne’ebé reafirma kompromisu ninia governasaun nian atu kolabora ho família vítima, veteranu sira no sosiedade sivíl hodi hetan vítima sira-nia isin ne’ebé lakon no lori sira ba Jardim dos Heróis no garante rekoñesimentu ne’ebé sai hanesan ema hotu nia direitu.
