Vise-Primeiru-Ministru fó pose ba koordenadór foun Gabinete Apoiu ba Sosiedade Sivíl
Vise-Primeiru-Ministru, Ministru Koordenadór ba Asuntus Sosiais, Mariano ASSANAMI Sabino, fó pose ba Joaquim Freitas nu’udar Koordenadór foun Gabinete Apoiu ba Sosiedade Sivíl (GASC, sigla iha lian portugés), iha loron 2 fulan-abríl tinan 2024, iha Palásiu Governu, Dili. 
Iha ninia diskursu, Vise-Primeiru-Ministru, konsidera sosiedade sivíl hanesan parseiru importante ida ba asaun governativa, ne’ebé dezempeña ona papél fundamental iha prestasaun serbisu sosiál ba populasaun.
Haree katak “nasaun ne’e adota ona sistema demokrátiku partisipativa”, Vise-Primeiru-Ministru konsidera katak “importante tebes ba sosiedade sivíl atu partisipa no kontinua halo kritika konstrutiva kona-ba asaun Governu nian”. 
Nomeasaun ba koordenadór foun GASC ne’e marka pasu signifikativu ida no estabelese tuir lei, hodi promove kolaborasaun entre Governu no organizasaun sosiedade sivíl sira hodi implementa serbisu sosiál iha komunidade, tuir polítika governu nian. 
Mariano ASSANAMI Sabino ezije koordenadór foun GASC nian atu serbisu ho integridade, responsabilidade, no dedikasaun, hodi garante formasaun ba ekipa ida solidu no foka ba fornesimentu servisu ne’ebé di’ak-liu ba dezenvolvimentu povu no nasaun, hodi la’o tuir eroi sira-nia ain fatin iha tempu pasadu, sein prekonseitu ka influénsia polítika.
