Governu Timor-Leste

Primeiru-Ministru, Kay Rala Xanana Gusmão, lori Governu no povu Timor-Leste nia naran, hato’o parabéns ba Prabowo Subianto tanba hili nia hanesan Prezidente Repúblika Indonézia.

Primeiru-Ministru, iha ninia karta felisitasoins ne’ebé haruka ba Prezidente foun indonézia nian, rekoñese “vitória boot-tebes iha eleisaun”, ne’ebé “hatudu konfiansa povu indonéziu nian iha ninia lideransa no iha ninia vizaun ba futuru nasaun”. Eleisaun ida-ne’e reafirma espetativa katak, “ho ninia matenek no esperiénsia” Prabowo Subianto “sei sai Prezidente ezemplár no lider rejionál no globál ida ne’ebé signifikativu”.

Kay Rala Xanana Gusmão konsidera katak iha “momentu ida ne’ebé la hakmatek no mudansa iha relasaun internasionál, Indonézia iha papél sentrál ida atu dezempeña hodi promove kooperasaun, toleránsia no pás”, no liuhusi lideransa Prezidente foun nian “Indonézia mós sei sai poténsia ekonómika globál ida”, “ne’ebé sei ajuda atu promove kreximentu ekonómiku no prosperidade iha ita-nia rejiaun”.

Iha ninia karta, Xefe Governu ko’alia-liu katak “Timor-Leste no Indonézia iha relasaun bilaterál ida ne’ebé forte, bazeia ba amizade no kooperasaun, no hamutuk, ita-nia país fornese modelu globál ida ba rekonsiliasaun no podér transformadór ba diálogu no konfiansa”. Nia manifesta mós ninia konfiansa katak, iha Prezidente-eleitu ninia lideransa, “relasaun bilaterál sei sai metin liután”, no nia “iha esperansa atu serbisu hamutuk iha kestaun sira interese mútuu nian”.