Ministru Bendito Freitas hala'o vizita ofisial ba Xina atu hametin relasaun bilateral
Ministru Negósius Estranjeirus no Kooperasaun, Bendito dos Santos Freitas, tersa-feira ne’e, hala’o vizita ofisiál ba dahuluk ba Repúblika Populár Xína, hahú iha loron 2 to’o loron 5 fulan-Abríl tinan ne’e. 
Vizita ofisiál Ministru Bendito Freitas ba Repúblika Populár Xina ne’e, hala’o tuir konvite ofisiál husi ninia omólogu xinés, Ministru Negósius Estranjeirus, Wang Yi, ho objetivu atu hametin liután relasoins diplomátikas no kooperasaun bilaterál entre Timor-Leste no Xina.
Durante sorumutuk bilaterál entre Ministru Bendito Freitas ho ninia omólogu xinés, Wang Yi, sei diskute asuntus importante ne’ebé relasiona ho rai rua nia interesse, no mós Prezidente Repúblika, José Ramos-Horta nia vizita estadu ba Xína, Belt and Road Cooperation Plan, pozisaun Xína ba South China Sea Issue, reitera apoiu husi Xína nian ba Timor-Leste nia adezaun ba ASEAN, kooperasaun entre nasaun membru CPLP sira ho Xína, Akordu Servisu Aereo entre Timor-Leste ho Xína no seluk tan.
