Governu Timor-Leste

Iha loron 27 fulan-marsu tinan 2024 liubá, Konsellu Ministrus delibera hodi aprova adendas kontratus atu estende períodu konstrusaun no supervizaun ba projetu melloria no manutensaun estrada entre Baukau no Venilale, no konstrusaun estrada 2,5 km tan iha projetu reabilitasaun no manutensaun estrada distritál entre Bazartete no Tokoluli. 

Iha projetu melloria no manutensaun estrada iha Lote 2: Venilale – Vikeke (Sta 27+120 – 62’101), prazu kontratu ba konstrusaun sei estende to’o loron 29 fulan-juñu tinan 2025 no prazu supervizaun obra sei estende to’o loron 30 fulan-juñu tinan 2025, ne’ebé sei implika kustu adisionál ida ho valór dolar amerikanu besik rihun 903.

Relasiona ho projetu reabilitasaun no manutensaun estrada distritál sira, estrada diresaun Bazartete to’o Tokoluli (Sta. 16+02 – Sta. 32+045), adenda ne’ebé aprova sei permite konstrusaun estrada 2,5 km tan, ne’ebé sei implika kustu adisionál ida ho valór dolar amerikanu millaun 1,55 no estensaun prazu kontratu nian ba loron 184.

Rekoñese katak konstrusaun no manutensaun ba infraestruturas produtivas oioin maka pilár sentrál ida iha Planu Estratéjiku Dezenvolvimentu, ne’ebé sei permite sustenta produtividade, kriasaun empregu no dezenvolvimentu setór privadu iha nivel nasionál, Governu reafirma ninia kompromisu atu kontinua implementa planu infraestrutura rodoviária ida ne’ebé abranjente tuir padraun internasionál ho kualidade no seguransa.