Governu Timor-Leste

“Atu la’o ba oin la presiza haluhan ita nia istória rasik”

Sesta-feira, loron 20 fulan Agustu tinan 2010, F-FDTL komemora loron Forsa Armada ba Libertasaun Nasionál (FALENTIL) datolunuluk resin lima, iha Palásiu Governu, Díli, ho tópiku “ATU LA’O BA OIN LA PRESIZA HALUHA ITA NIA ISTÓRIA RASIK” tanba loron 20 fulan Agostu hanesan loron importante no istóriku hodi asegura no fó hanoin nafatin ba ema sira ne’ebé fó-an ba mate iha funu hasoru inimigu.

Iha diskursu Prezidente Repúblika, José Ramos-Horta, hateten katak, “Hametin no haklean relasaun konfiansa  ho país viziñu sira ne’ebé hatudu rezultadu pozitivu, ezersisiu militár navál konjuntu ne’ebé ita halo foin dadauk ho forsa Estadus Unidus Amerika, ho forsa Australianu, ezemplu pozitivu fó kontribuisaun ba F-FDTL, hatudu esforsu nasionál íntrega rejionál no relasaun boaviziñansa”.

Aleinde n’e mós Prezidente hanesan Komandante Supremu ba F-FDTL hato’o nia sentimentu ba instituisaun katak, “Atu halo misaun ne’ebé Estadu hein hosi Falintil mak Estadu tenke kontinua investe maka’as iha formasaun militár sira nian ba Estadu Timor-Leste nia kontribuisaun ba estabilidade no pás rejionál” .

Iha okaziaun ne’e mós Prezidente Repúblika hanesan Komandante Supremu husu ba ofisiál militár sira hotu ne’ebé hatudu ona servisu, dedikasaun no sakrifísiu atu kontinua misaun ne’ebé hahú hosi ferik no katuas sira hodi nune’e bele merese respeitu no admirasaun hosi povu”.

Nune’e mós iha fatin hanesan Majór-Jenerál F-FDTL, Taur Matan Ruak, hato’o nia diskursu katak “Hametin ita nia identidade Nasionál atu Governante bele fomenta sintimentu nasionál, hametin no haburas prosesu demokrátiku no pás ne’ebé iha toleránsia aas iha ita nia rain, haburas instituisaun Governu, Estadu no organizmu dependénsia, realmente reforsa estabilidade polítika no sosiál, kondisaun estável atu hakat ba dezenvolvimentu ekonómiku ne’ebé lori pás no prospriedade rohan la’ek ba rai Timor no timór-oan sira hotu iha loron oin-mai”.

Majór Jenerál realsa tan katak, “fatór sira ne’e hotu importante tebes atu harii Nasaun no Estadu ne’ebé forte, firmi ho kapasidade atu enfrenta dezafiu sira ne’ebé akompaña iha jornada ba miléniu foun, hahú uluk ohin no aban falintil ne’ebé iha promesa la muda, harii Timor-Leste ida ne’ebé polítikamente independente, neutru, solidaridade, ekonómikamente prósperu no autosustetável,”

Iha komemorasaun ne’e atu fó hanoin mós ba labarik no joven sira bele koñese no respeita funu-nain sira, ne’ebé halo funu iha tinan 24 nia laran, tanba Falentil mak hanesan asuwain no matadalan ba funu Libertasaun Nasionál, hodi nune’e ita bele hetan dalan naroman ba Independênsia.

Marka prezensa iha komemorasaun loron FALENTIL datolunuluk resin lima ne’e mak hanesan, Prezidente Repúblika, José Ramos-Horta, Prezidente Parlamentu Nasionál, Fernando de Araujo, Primeiru-Ministru,  Kay Rala Xanana Gusmão, Prezidente Tribunál Rekursu Interinu, Maria Natércia Gusmão Pereira, Prokuradora-Jerál Repúblika, Dra. Ana Pessoa, membru Parlamentu Nasionál, membru Governu, Korpu Diplomátiku sira, reprezentante Igreja Katólika, relijioza sira seluk no entidade sira hotu.