Governu Timor-Leste

Ministru Petróleu no Rekursus Minerais, Francisco da Costa Monteiro no Diretór Korporasaun Finanseira Internasionál (IFC, sigla iha lian inglés) ba Indonézia no Timor-Leste, Euan Marshall, asina akordu kooperasaun ida ne’ebé engloba asisténsia téknika iha dezenvolvimentu kuadru legál, regulamentár no área sira seluk ba Projetu Kaptura no Armazenamentu Karbonu (CCS, sigla iha lian inglés). Asinatura ne’e realiza iha instalasaun ministériu ne’e nian, iha loron 21 fulan-marsu tinan 2024.

Euan Marshall, Diretór IFC, salienta katak projetu CCS, ne’ebé iha ligasaun ho enserramentu produsaun iha kampu gás Bayu-Undan, hanesan oportunidade inovadora no lukrativa ida ba Timor-Leste, liuhusi jestaun posu no instalasaun iha plataforma Bayu-Undan nian. Nia mós afirma katak projetu ida-ne’e iha interese espesiál, haree katak Timor-Leste daudaun ne’e prepara atu lidera teknolojia CCS no merkadu ne’ebé korresponde iha rejiaun ne’e. 

Ministru Francisco da Costa Monteiro ko’alia-liu katak projetu ida-ne’e nu’udár inisiativa importante ida hodi dezkarboniza indústria petrolífera, nune’e bele kontribui ba jestaun klimátika ida sustentavel, kontrolu Dióksidu Karbonu iha atmosfera no kontinuidade ba produsaun mina-rai no gás. 

Relasiona ho benefísiu husi CCS, Governante ne’e ko’alia-liu ninia impaktu ekonómiku signifikativu, ne’ebé permite manutensaun ativa ba instalasaun plataforma Bayu-Undan nian, liuhusi kriasaun oportunidade empregu no impaktu sosiuekonómiku sira seluk. 

Akordu ida-ne’e entre Ministru Petróleu no Rekursus Minerais no IFC, hanesan kontinuidade husi serbisu ne’ebé realiza ona ho entidade relevante sira hodi fahe koñesimentu kona-ba teknolojia CCS nian. Foku atuál maka asisténsia téknika ba dezenvolvimentu kuadru legál no regulatóriu no aspetu esensiál sira seluk ba projetu CCS.

Asinatura akordu ne’e mós marka prezensa husi David Freedman, reprezentante IFC nian iha Timor-Leste.